Çay saatlarının imtinaedilməz ləzzəti olan almalı qurabiyəni bu dəfə qatıq istifadə etmədən hazırlayırıq.
Pravda.az bildirir ki, xəmiri xırtıldayan və ağızda dağılan bu resept mütləq sevimlilərinizdən biri olacaq.
Hazırlanma vaxtı: 20 dəqiqə
Bişmə vaxtı: 20 dəqiqə
Porsiya sayı: 6-8 nəfərlik
Lazım olan ərzaqlar
İçlik üçün:
3 ədəd alma
1 çay qaşığı darçın
1 çay stəkanı çəkilmiş qoz ləpəsi
3 xörək qaşığı şəkər tozu
Xəmir üçün:
250 qram kərə yağı (otaq temperaturunda yumşaldılmış)
1 çay stəkanı duru yağ
1 xörək qaşığı sirkə (üzüm və ya alma)
1 paket vanil (5 qram)
1 paket qabartma tozu (10 qram)
1 çay stəkanı şəkər pudrası
Apardığı qədər un (təxminən 3.5 - 4 stəkan)
Üzəri üçün:
Şəkər pudrası
Hazırlanma qaydası
İçliyin hazırlanması
Almaların qabığını soyun və sürtgəcin böyük gözündən keçirin.
Rəndələnmiş almaları bir tavaya qoyun, üzərinə şəkər tozunu əlavə edib almalar suyunu çəkənə qədər orta odda bişirin.
Ocaqdan götürməyə yaxın darçın və çəkilmiş qozu əlavə edib qarışdırın. İçliyi tam soyuması üçün kənara qoyun.
Xəmirin yoğrulması
Dərin bir qaba yumşalmış kərə yağı, duru yağı, sirkəni və şəkər pudrasını əlavə edib yaxşıca qarışdırın.
Üzərinə vanil və qabartma tozunu əlavə edin.
Unu az-az və ələyərək qarışığa qatın. Ələ yapışmayan, yumşaq və qulaq məməsi konsistensiyasında bir xəmir yoğurun.
Formanın verilməsi və bişirilməsi
Xəmiri 3-4 bərabər hissəyə (kündəyə) bölün.
Hər kündəni oxlov vasitəsilə təxminən yarım santimetr qalınlığında dairəvi şəkildə açın.
Açdığınız dairəni bıçaqla əvvəlcə dörd yerə, sonra isə hər hissəni yenidən bölərək cəmi 8 üçbucaqlı dilimə kəsin (pizza dilimi kimi).
Üçbucaqların geniş tərəfinə hazırladığınız almalı içlikdən 1 şirniyyat qaşığı qoyun və bükərək rulet forması verin.
Hazırladığınız qurabiyələri yağlı kağız sərilmiş soba sinisinə düzün.
Əvvəlcədən 180°C dərəcədə qızdırılmış sobada, üzərləri yüngülcə qızarana qədər (təxminən 20 dəqiqə) bişirin.
Sobadan çıxan qurabiyələrin tam soyumasını gözləyin. Tam soyuduqdan sonra üzərinə ələk vasitəsilə şəkər pudrası səpərək servis edə bilərsiniz.
Qeyd: Qurabiyələrin xırtıldayan olması üçün almalı içliyin xəmirə qoyularkən tamamilə soyuq olması şərtdir. İsti içlik xəmiri yumşaldar.
Əminə Bayramova
