Litvanın paytaxtı Vilnüs yaxınlığında aşkarlanan şübhəli pilotsuz uçuş aparatı (PUA) səbəbindən verilən hava həyəcanı təşvişə səbəb olarkən, ölkə rəhbərliyi sığınacaqlara endirilib.
AFN.az xəbər verir ki, Litva Milli Radio və Televiziyasının (LRT) məlumatına görə, Litva Silahlı Qüvvələri səhər saatlarında ölkənin Belarus ilə sərhəd xəttinə yaxın bölgələrində radar izi aşkarlanmasının ardından NATO Baltik Hava Polisi vəzifəsini işə salıb və xalqa təcili xəbərdarlıq mesajları göndərib.
Rəsmilər İqnalina, Utena, Zarasai və Şvençionis bölgələrində müşahidə olunan hərəkətlilikdən sonra həyəcan siqnalının Vilnüs və ətrafına genişləndirildiyini açıqlayıb.
Litva Milli Böhran İdarəetmə Mərkəzinin rəhbəri Vilmantas Vitkauskas Vilnüs bölgəsi üzərində bir PUA görüldüyünü təsdiqləyib.
Xalqa göndərilən mesajlarda sığınacaqlara və ya təhlükəsiz yerlərə keçmələri tələb edilərkən, Vilnüs bölgəsindəki həyəcan səviyyəsi daha sonra təcili təhdid səviyyəsi olan "qırmızı"ya yüksəldilib.
Hava həyəcanı səbəbindən Prezident Gitanas Nauseda və Prezident Aparatının əməkdaşları, Baş nazir İnqa Ruqiniene və parlamentdəki millət vəkilləri də sığınacaqlara aparılıb.
Digər tərəfdən, Vilnüs Hava Limanı üzərindəki hava məkanı həyəcan səbəbindən bağlandıqdan sonra yerli vaxtla saat 11:00 radələrində yenidən açılıb.
Bəzi bölgələrdə qatar səfərləri də qısa müddətə dayandırılarkən, Vilnüs qatar vağzalındakı sərnişinlər təxliyə edilib. Dəmir yolu səfərləri sonrakı saatlarda yenidən normallaşıb.
Litva ordusundan verilən açıqlamada "Bu hadisə son günlərdə Latviya və Estoniyada gördüyümüz vəziyyətlərə bənzəyir. Xalqı xəbərdar etmək standart bir profilaktik tədbirdir" ifadələri işlədilib.
