Avropa İttifaqı Ukraynaya nəzərdə tutulan 90 milyard avroluq yardım paketinin bir hissəsinin ayrılmasını yeni vergi islahatları ilə əlaqələndirəcək. Bu barədə “Bloomberg” mənbələrə istinadən məlumat yayıb...
Poliqon xəbər verir ki, söhbət 8,4 milyard avro həcmində makromaliyyə yardımından gedir. Mənbələrin bildirdiyinə görə, Aİ ölkələri bazar ertəsi bu proqramın şərtlərini razılaşdırıblar.
Kiyev bu vəsaiti əldə etmək üçün 150 avroya qədər olan beynəlxalq bağlamalara 20% ƏDV tətbiq edən qanunu qəbul etməlidir. Plana əsasən, Ukrayna ilk tranşı iyunda, ikincini sentyabrda, üçüncünü isə ilin sonuna qədər ala bilər.
Bloomberg-in mənbələri bildirir ki, bu tələb Beynəlxalq Valyuta Fondu tərəfindən Ukraynaya 700 milyon dollarlıq əlavə tranş üçün irəli sürülən şərtlərlə üst-üstə düşür. Avropa Komissiyası maliyyə yardımının şərtlərini BVF ilə koordinasiya edir.
Lakin bu vergi dəyişiklikləri Ukraynada ciddi narazılıq doğurur və parlamentdə onların qəbul olunmasını çətinləşdirir. Deputat Yaroslav Jeleznyak Bloomberg-ə bildirib ki, hazırda qanunun qəbul edilməsi üçün kifayət qədər səs yoxdur.
Ukraynanın Maliyyə Nazirliyi isə agentliyə açıqlamasında hökumətin Aİ ilə razılaşmanın yekunlaşdırılması üzərində işlədiyini bildirib.
Bloomberg-in qeyd etdiyi kimi, ukraynalılar ümumilikdə vergi yükünü artıran təşəbbüslərə mənfi yanaşır, baxmayaraq ki, əlavə gəlirlər ordunun maliyyələşdirilməsi üçün vacibdir. Eyni zamanda, bu islahatların bir hissəsi Ukraynanın Aİ-yə üzvlük prosesində tələb olunur.
Mənbələrin məlumatına görə, BVF və Aİ artıq daha bir həssas vergi islahatının – daha çox sahibkarın ƏDV ödəməsini tələb edən qaydanın – bir il təxirə salınmasına razılaşıblar.
May ayının sonunda BVF Ukraynaya yardım proqramına yenidən baxacaq. Mənbələrdən birinin Bloomberg-ə bildirdiyinə görə, fond beynəlxalq bağlamalara vergi tətbiqi tələbinin də təxirə salınmasını nəzərdən keçirə bilər.
Poliqon.info
