Çinin iki müdafiə şirkəti uzaqmənzilli snayper atəşi üzrə yeni rekordun mümkün müəyyən edilməsi ilə bağlı qeyri-müəyyən açıqlamalar yayıb...
Poliqon xəbər verir ki, bu barədə Interesting Engineering nəşri yazır. Bildirilir ki, şirkətlərdən heç biri silahın texniki xüsusiyyətlərini və ya müstəqil təsdiqləyici məlumatları təqdim etməyib.
Ötən ayın sonunda Çinin ən böyük sursat istehsalçılarından biri olan "Chongqing Changjiang Electric Appliances Industries Group" şirkəti açıqlamasında müəyyən məhsulun "xüsusi sınaq" zamanı "oxşar məhsullar arasında dünya rekordunu uğurla yenilədiyini" bildirib.
Bir gün sonra hərbi səviyyəli optika təchizatçısı olan "Hunan Huanan OptoElectronic Group" da qısa açıqlama yayıb. Şirkət qeyd edib ki, onun məhsulu "xüsusi snayper sınağında" istifadə olunub və "bu sahədə sistemin yenidən dünya rekordunu qırmasına kömək edib".
Şirkət nişangahın "aydın görüntü" və "son dərəcə etibarlı optik ox" xüsusiyyətlərini vurğulasa da, sınaq şərtləri və istifadə edilən konkret məhsul barədə ətraflı məlumat verməyib.
Mümkün ipucu "Hunan Huanan OptoElectronic Group" şirkətinin ötənilki açıqlamasında yer alıb. Həmin məlumatda bildirilib ki, Çində hazırlanmış CS/LR24 tüfəngi təxminən 9898 fut (təxminən 3017 metr) məsafədə yerləşən beş hədəfin beşini də uğurla vurub. Bu nəticə 8,6 mm çaplı patronlardan istifadə edən tüfənglər arasında rekord kimi təqdim olunub. Bu çaplı patronlar geri təpmə, məsafə və zərbə gücü arasında balansın vacib olduğu yüksək dəqiqlikli uzaqmənzilli atışlarda geniş istifadə edilir.
Hazırda təsdiqlənmiş ən uzaq snayper zərbəsi rekordu 4000 metr təşkil edir. Bu nəticə ötən ilin avqustunda Ukraynanın "Privid" bölməsinin snayperi tərəfindən əldə olunub. O, 8,6 mm-dən daha iri çaplı patronlardan istifadə edib. Çin şirkətlərinin son açıqlamalarından sonra internet forumlarında istifadə olunan sistemin 11 483 futdan (3400 metr) artıq məsafəni aşdığı barədə ehtimallar yayılıb.
Ukraynalı hərbçi 14,5 mm çaplı "Alliqator" tüfəngi ilə 4000 metr məsafədən atəş açaraq Pokrovsk istiqamətində iki işğalçını məhv edib. Maraqlıdır ki, əvvəlki rekord da ukraynalılara məxsus olub. Belə ki, bir müddət əvvəl Ukrayna Təhlükəsizlik Xidmətinin bölmələrindən birinin döyüşçüsü Ukrayna istehsalı olan "Vlastelin qorizonta" tüfəngi ilə 3800 metr məsafədən işğalçını zərərsizləşdirib.
Poliqon.info
