Telekanalın məlumatına görə, Yaxın Şərqdə ABŞ- nin ən azı 16 hərbi obyektin yararsız hala düşüb...
Poliqon xəbər verir ki, CNN telekanalı öz araşdırmasına istinadən İranın Yaxın Şərqdə yerləşən ABŞ hərbi bazalarına endirdiyi zərbələrin ciddi nəticələrə səbəb olduğunu iddia edib. Telekanalın məlumatına görə, hücumlar nəticəsində azı 16 Amerika hərbi bazası dağıdılıb və artıq istifadə üçün yararsız vəziyyətə düşüb.
Araşdırmada qeyd olunur ki, zərər görən obyektlər regiondakı ABŞ hərbi infrastrukturunun böyük hissəsini təşkil edir. Bu isə Vaşinqtonun Yaxın Şərqdəki əməliyyat imkanlarına ciddi təsir göstərə biləcək amil kimi qiymətləndirilir.
Xüsusilə vurğulanır ki, Əl-Udeyd Hərbi Hava Bazası ərazisində yerləşən aviasiya idarəetmə mərkəzi iki dəfə zərbəyə məruz qalıb. Məlumata görə, bu mərkəz normal şəraitdə 21 ölkənin hava məkanına nəzarət funksiyasını yerinə yetirməli idi və onun sıradan çıxması regional hava əməliyyatlarının koordinasiyasını çətinləşdirə bilər.
Bununla belə, Ağ Ev və Pentaqon CNN-in irəli sürdüyü nəticələri təsdiqləməyib. Rəsmi qurumlar məsələ ilə bağlı fərqli qiymətləndirmələrin mövcud olduğunu bildirərək, məlumatların dəqiqliyinə dair şübhələr olduğunu qeyd ediblər.
Mütəxəssislər hesab edir ki, bu cür ziddiyyətli açıqlamalar informasiya müharibəsinin tərkib hissəsi ola bilər və real vəziyyətin tam mənzərəsi yalnız əlavə sübutlar ortaya çıxdıqdan sonra aydınlaşacaq.
Poliqon.info
