Yuxu sadəcə istirahət deyil, həm də bədənin özünü bərpa etdiyi həyati prosesdir.
Pravda.az bildirir ki, hər yaşın özünəməxsus yuxu ehtiyacı var və bu normalara əməl etməmək ciddi sağlamlıq problemlərinə zəmin yaradır.
Müasir dövrün ən böyük problemlərindən biri olan yuxusuzluq diqqət dağınıqlığından tutmuş ürək xəstəliklərinə qədər bir çox fəsad törədir. ABŞ Milli Yuxu Fondunun (National Sleep Foundation) apardığı genişmiqyaslı araşdırmalar nəticəsində müxtəlif yaş dövrləri üçün zəruri olan yuxu saatları müəyyən edilib.
Yaş qruplarına görə tələb olunan yuxu saatları:
Yeni doğulmuşlar (0-3 ay): Gündə 14-17 saat.
Körpələr (4-11 ay): Gündə 12-15 saat.
Uşaqlar (1-2 yaş): 11-14 saat.
Məktəbəqədər dövr (3-5 yaş): 10-13 saat.
Məktəb yaşlı uşaqlar (6-13 yaş): 9-11 saat.
Yeniyetmələr (14-17 yaş): 8-10 saat.
Gənclər və böyüklər (18-64 yaş): 7-9 saat.
Yaşlılar (65 yaş və yuxarı): 7-8 saat.
Keyfiyyətli yuxu üçün mütəxəssis tövsiyələri
Mütəxəssislər qeyd edir ki, yalnız yuxunun müddəti deyil, onun dərinliyi və kəsintisiz olması da mühüm rol oynayır. Sağlam yuxu rejimi üçün aşağıdakı qaydalara əməl olunması vacibdir:
Rejim tətbiq edin: Hər gün eyni saatda yatıb eyni saatda oyanmaq bioloji saatı tənzimləyir.
Mühiti hazırlayın: Yataq otağı tam qaranlıq, səssiz və nəmişlikdən uzaq, sərin olmalıdır.
Texnologiyadan uzaqlaşın: Yatmazdan əvvəl telefon və planşet kimi mavi işıq yayan cihazlardan istifadə melatonin hormonunun ifrazını ləngidir.
Qidalanmaya diqqət: Axşam saatlarında ağır yeməklərdən və kofein tərkibli içkilərdən imtina edilməlidir.
Əminə Bayramova
