Ağ Evin mətbuat katibi Karoline Levitt 28 aprel 2026-cı il tarixində ABŞ Prezidenti Donald Trump barədə daha bir açıqlama verib.
Musavat.com xəbər verir ki, Levitt bildirib ki, Prezident Tramp “ona qarşı həyatına son qoymağa yönəlmiş cəhdin yaratdığı xaos şəraitində belə təmkinini qoruyub” və onun davranışını heyrətamiz adlandırıb: “Başqa bir adamın onun həyatına son qoymağa fəal şəkildə cəhd göstərdiyi zaman baş verən xaos qarşısında Prezident Trampın təmkini heyrətamiz idi. Prezident Tramp qorxmazdır, çünki o bu ölkəni sevir və Amerika xalqına verdiyi vədləri yerinə yetirmək üçün öz həyatını təhlükəyə atmağa hazırdır. Qorxusuz bir Prezidentimiz olduğuna görə xoşbəxt olsaq da, cəmiyyətimizə daimi siyasi zorakılıq qorxusunun hakim olduğu bir ölkədə yaşamamalıyıq".
Açıqlama ABŞ siyasi mühitində geniş rezonans doğurub. Tramp tərəfdarları bu bəyanatı Prezidentin “liderlik və qətiyyət nümayişi” kimi qiymətləndirsə də, tənqidçilər ritorikanın siyasi gərginliyi daha da artırdığı fikrini irəli sürürlər.
Mövzu ilə bağlı sosial mediada da müxtəlif reaksiyalar yaranıb. Bir qisim istifadəçi Ağ Evin Prezidentin təhlükəsizlik vəziyyətini qabardaraq siyasi mesaj verdiyini iddia edir, digərləri isə bu cür açıqlamaların ABŞ-də artan siyasi qütbləşməni daha da dərinləşdirə biləcəyini bildirir.
Hadisənin detalları və iddia olunan təhlükə cəhdi ilə bağlı isə rəsmi qurumlar əlavə məlumat açıqlamayıb.
E.Məmmədəliyev,
Musavat.com
