Stokholm, 28 aprel, AZƏRTAC
İsveçin ədliyyə naziri Qunnar Strömmer və polis nümayəndəsi Stefan Hektor cinayətkarlığa qarşı mübarizədə əməkdaşlığı gücləndirmək üçün Tunisə səfər ediblər.
AZƏRTAC xəbər verir ki, hakimiyyət orqanlarının məlumatına görə, ölkədə İsveç cinayətkar qruplarının təxminən 10-20 üzvü ola bilər. Gün ərzində Strömmer Tunisin daxili işlər naziri Xaled Nuri ilə danışıqlar aparıb, polis əməkdaşlığının gücləndirilməsi, eləcə də cinayətkarlığa qarşı mübarizə ilə bağlı ikitərəfli sazişin bağlanması məsələləri müzakirə olunub.
Tərəflər ağır cinayətkarlığa, narkotik qaçaqmalçılığına və çirkli pulların yuyulmasına qarşı tədbirləri müzakirə ediblər.
“Onlar zorakılıq əmri verir, uşaqları işə cəlb edir və yaşlı vətəndaşlarımıza qarşı genişmiqyaslı fırıldaqçılıq təşkil edirlər. Eyni zamanda, onlar tez-tez cinayət törədən və olduqları yerdə zorakı hadisələrin baş verməsi riski yaradanlardır”, - deyə nazir bildirib.
İsveç bundan əvvəl Türkiyə, BƏƏ, İraq və Mərakeşlə oxşar müqavilələr bağlayıb.
Polis artıq iki böyük cinayətkar şəbəkənin zərərsizləşdirildiyini, hazırda isə diqqətin üçüncüsünə yönəldiyini bildirir. Əsas hədəf cinayət aləmində geniş nüfuza malik olan bir neçə rəhbər şəxsdir.
