BAKI,TurkicWorld, Orxan Qədirzadə
İsrail rəsmiləri Livan cəbhəsində artan gərginlik fonunda “Hizbullah”ın fəaliyyətinə qarşı sərt bəyanatlarla çıxış edib.
TurkicWorld xəbər verir ki, İsrail müdafiə naziri İsrail Kats “Hizbullah”ın baş katibi Nəim Qasım barədə danışaraq onun “təhlükəli oyun oynadığını” bildirib və bunun Livan üçün ciddi nəticələr doğura biləcəyini vurğulayıb.
Nazirin açıqlamasında qeyd olunub ki, əgər Livan hökuməti “Hizbullah”ın fəaliyyətinə qarşı adekvat mövqe sərgiləməzsə, regionda qarşıdurma daha da genişlənə bilər.
Eyni zamanda Benyamin Netanyahu bildirib ki, “Hizbullah” tərəfindən atılan raketlər və pilotsuz uçuş aparatları İsrail üçün əsas təhlükə olaraq qalır və buna qarşı əlavə hərbi tədbirlər görülməsi zəruridir.
Məlumata görə, Livan tərəfi isə İsraillə birbaşa danışıqlar məsələsində daxili fikir ayrılığı yaşayır. Cozef Aun danışıqların əsas məqsədinin müharibəni dayandırmaq olduğunu bildirsə də, “Hizbullah” bu prosesi qəti şəkildə rədd edir.
Ekspertlər qeyd edir ki, tərəflər arasında qarşılıqlı ittihamlar və hərbi fəaliyyətlərin davam etməsi regionda sabitlik perspektivlərini zəiflədir. Son aylarda baş verən toqquşmalar nəticəsində yüz minlərlə insanın məcburi köçkün vəziyyətinə düşdüyü bildirilir.
Ekspertlər xəbərdarlıq edir ki, mövcud vəziyyət nəzarətdən çıxarsa, bu, daha genişmiqyaslı regional qarşıdurmaya gətirib çıxara bilər.
