“İnter” klubunun prezidenti Cüzeppe Marotta keçmiş A Seriyası hakimlər kollegiyasının rəhbəri Canluka Rokki ətrafında yaranmış qalmaqala münasibət bildirib.
90deqiqe.Az xəbər verir ki, funksioner bu barədə jurnalistlərə açıqlamasında deyib.
“Biz hər şeyi mətbuatdan öyrənirik. Bu açıqlamalar bizi təəccübləndirir. Bizim üçün xoş və ya xoş olmayan hakim anlayışı yoxdur. Bizim tamamilə ədalətli şəkildə fəaliyyət göstərdiyimiz məlumdur və bu, hamını sakitləşdirməli əsas məqamdır.
Ötən mövsümdə isə — şikayət etmək üçün demirəm — bizim əleyhimizə verilmiş qərarlar da oldu, hətta açıq-aşkar səhvlər, məsələn ‘İnter’ – ‘Roma’ matçında verilməyən penalti kimi”.
Prokurorluğun “San-Siro”da İtaliya Kubokunun ilk oyunu zamanı baş verən hadisələrlə bağlı sualına cavab verən Marotta əlavə edib:
“Mən bu vəziyyətdən təəccübləndim, çünki heç bir əlaqə görə bilmirəm. Hər şeyi mətbuatdan öyrəndim və ətraflı cavab verdim. Daha nəsə demək istəmirəm. Biz hazırda Turində oyuna köklənmişik və layiq olduğumuz çempionluq uğrunda mübarizə aparırıq. Biz tamamilə dürüst şəkildə hərəkət etmişik”.
Milan prokurorluğu fırıldaqçılıq işi ilə bağlı istintaqa başladıqdan sonra Canluka Rokki vəzifəsindən ayrılıb.
Daha əvvəl mediada Rokkinin fırıldaqçılıqda və hakim təyinatlarının manipulyasiyasında şübhəli bilinməsi ilə bağlı məlumatlar yayılmışdı. Həmin iddialara görə, bu proseslər “İnter”in xeyrinə ola bilərdi.
