Orta Şərqdə davam edən gərginlik və geosiyasi qeyri-müəyyənliklər fonunda Avropa birjaları Fransa istisna olmaqla mənfi bir tendensiya nümayiş etdirir. İnvestorlar hazırda bütün diqqətini regionda açıqlanacaq Satınalma Menecerləri İndeksi (PMI) göstəricilərinə yönəldib. Avropa bazarlarında olan məlumata əsasən, Stoxx Europe 600 göstərici indeksi 0,4 faiz itki ilə 611,4 bənd səviyyəsinə düşdüyü halda, Fransanın CAC 40 indeksi digər bazarlardan fərqlənərək 0,3 faiz yüksəlişlə ticarət olunur.
Redaktor.az bu barədə "Yenicag gazetesi"nə istinadla məlumat verir.
Digər aparıcı ölkələrin birja indekslərində də eniş meylləri müşahidə edilir; belə ki, İngiltərənin FTSE 100 indeksi 0,6 faiz azalaraq 10.412 bəndə, Almaniyanın DAX 40 indeksi 0,5 faiz dəyər itkisi ilə 24.082 bəndə geriləyib. İtaliyanın FTSE MIB 30 indeksi 0,3 faiz düşüşlə 47.631 bənd, İspaniyanın IBEX 35 indeksi isə 0,8 faiz azalma ilə 17.860 bənd səviyyəsində qərarlaşıb. ABŞ Prezidenti Donald Trampın İranla atəşkəs müddətini uzatmaq qərarına baxmayaraq, ABŞ/İsrail-İran müharibəsi və atəşkəs prosesinin gələcəyinə dair şübhələr bazarlardakı təzyiqi qoruyub saxlayır.
Geosiyasi faktorlarla yanaşı, iqtisadi məlumatlar da bazarların istiqamətinə ciddi təsir göstərir. İngiltərədə mart ayında başa çatan 2025/2026-cı maliyyə ilində dövlət sektorunun xalis borclanmasının 132 milyar funt-sterlinq olaraq açıqlanması ilə büdcə kəsirinin milli gəlirə nisbəti son altı ilin ən aşağı səviyyəsinə düşüb. Korporativ sektorda isə Volkswagen şirkəti Çin bazarı ilə bağlı satış hədəflərini aşağı istiqamətdə yeniləyib. Şirkətin Çin üzrə rəhbəri Ralf Brandştedter, 2030-cu ilə qədər ölkədə 3,2 milyon vasitə satmağı planlaşdırdıqlarını bildirib ki, bu da əvvəlki 4 milyonluq proqnozla müqayisədə ciddi azalma deməkdir. Analitiklər günün qalan hissəsində Orta Şərqdəki proseslərlə bərabər, qlobal miqyasda elan olunacaq xidmət, emal sənayesi və kompozit PMI məlumatlarının birjaların hərəkətinə yön verəcəyini vurğulayırlar.
Xədicə BAXIŞLI
