ABŞ şirkətinin Yaxın Şərqdəki fəaliyyəti ilə bağlı təhlükəsizlik narahatlıqları artıb.
Redaktor.az xəbər verir ki, "The Guardian" qəzetinin məlumatına görə, ABŞ müdafiə podratçısı V2X işçilərini İraq və Küveytdən təxliyə etməyə çağırıb.
Məlumata əsasən, bu addım İranın dəstəklədiyi silahlı qruplar tərəfindən mümkün hücum təhlükəsi ilə əlaqədardır. ABŞ Dövlət Departamentinin rəsmilərinin də şirkət rəhbərliyinə bu risklərlə bağlı xəbərdarlıq etdiyi bildirilir.
Hesabatda qeyd olunur ki, İraq və Küveytdə yerləşən bazalarda çalışan işçilər təhlükəsizlik problemlərindən, o cümlədən dron hücumları və mühafizənin yetərsizliyindən narahat olduqlarını bildiriblər. Mart ayında baş verən dron hücumu nəticəsində bir işçinin həyatını itirdiyi də vurğulanır.
Məlumata görə, ABŞ hökuməti şirkətə əməkdaşların niyə riskli ərazilərdə saxlanıldığını izah etməsi üçün təzyiq göstərib və mümkün təxliyə dəstəyi məsələsini gündəmə gətirib.
Bildirilir ki, bəzi işçilər artıq təxliyə edilsə də, bir qismi hələ də bölgədə qalır və təhlükəsizliklə bağlı narahatlıqlar davam edir.
Aminə ŞAHSUVARQIZI
