Pontifik müharibələrə milyardlarla vəsait xərcləyən liderləri və dini ritorikadan hücumlara bəraət qazandırmaq üçün istifadə edən siyasətçiləri sərt tənqid edib...
Poliqon xəbər verir ki, bu barədə ANSA Agentliyi məlumat yayıb.
Papa XIV Lev bəyan edib ki, dünya bu gün “bir ovuc tiranın” siyasəti nəticəsində parçalanır. Pontifikin sözlərinə görə, beynəlxalq ictimaiyyətin qarşısında duran ən ağır problemlərdən biri odur ki, bəzi liderlər müharibələri davam etdirmək üçün nəhəng maliyyə resursları ayırır, lakin müalicə, təhsil və dağıdılmış ərazilərin bərpası üçün lazım olan vəsait tapılmır.
Roma Papası bildirib ki, müharibələrin təşkilatçıları və onları dəstəkləyən siyasi dairələr milyardlarla dolları qətllərə və dağıntılara yönəldirlər. O vurğulayıb ki, bu yanaşma bəşəri dəyərlərlə tam ziddiyyət təşkil edir və nəticədə milyonlarla insan əziyyət çəkir, ölkələr viran qalır, sosial sahələr isə diqqətdən kənarda qalır.
Papa XIV Lev dini dəyərlərin siyasi məqsədlər üçün alətə çevrilməsini də kəskin pisləyib. Onun fikrincə, Tanrının adını manipulyasiya edənlər inancı “qaranlığa və çirkaba” sürükləyirlər. Pontifik belə davranışların həm dinin mahiyyətinə, həm də mənəvi prinsiplərə ciddi zərbə vurduğunu diqqətə çatdırıb.
Bəyanatın ABŞ Prezidenti Donald Trampın Papa XIV Levə qarşı yönəlmiş tənqidlərindən sonra səsləndirilməsi xüsusi diqqət çəkib. Donald Tramp pontifiki İranla bağlı məsələdə respublikaçı siyasətçini qınadığına görə tənqid etmişdi. Bu isə Vatikanla Vaşinqton arasında ritorik gərginliyin daha da artdığını göstərən yeni siqnal kimi qiymətləndirilir.
Papa XIV Levin açıqlaması qlobal münaqişələrin, dini-siyasi ritorikanın və beynəlxalq liderlərin məsuliyyəti məsələsinin yenidən gündəmə gəldiyini göstərir. Onun mesajı həm müharibələrin maliyyələşdirilməsinə, həm də dinin siyasi məqsədlərlə istismar olunmasına qarşı açıq xəbərdarlıq kimi qəbul edilir.
Poliqon.info
