ain.az, Bizimyol portalından verilən məlumatlara əsaslanaraq xəbər verir.
Almaniya hökuməti ABŞ və İsrailin İrana qarşı hərbi əməliyyatı dövründə İsrailə silah tədarükünü davam etdirib.
Bizimyol.info xəbər verir ki, DPA agentliyinin Almaniya Bundestaqının “Solçular” partiyasından olan deputatı Ulrix Todenin sorğusuna hökumətin verdiyi cavaba istinadən yaydığı məlumata görə, 28 fevral–27 mart tarixləri arasında İsrailə ümumilikdə 6,6 milyon avro dəyərində silah göndərilib.
Bildirilir ki, bu tədarüklər ağır silah sistemlərini əhatə etməyib. Almaniya hökuməti ümumiyyətlə hərbi əməliyyat zonalarına silah ixracından çəkinir, lakin bu qaydadan əsas istisna kimi Ukrayna göstərilir. 2025-ci ilin avqustunda Almaniya Qəzza zolağında döyüşlər səbəbilə İsrailə silah ixracını dayandırmış, daha sonra Fələstin anklavında sülh planının icrasının başlanması ilə bu qərar ləğv edilmişdi.
Məlumata görə, ABŞ və İsrail 28 fevralda İrana qarşı genişmiqyaslı əməliyyata başlayıb. 7 aprel tarixində Ağ Evin rəhbəri İranla iki həftəlik qarşılıqlı atəşkəs elan edib. 11 aprel tarixində isə İran və ABŞ nümayəndə heyətləri İslamabadda bir neçə raund danışıqlar aparıb. İran tərəfinə parlament sədri Məhəmməd Baqer Kalibaf, ABŞ tərəfinə isə vitse-prezident Ceyms Devid Vens rəhbərlik edib. Lakin Tehran və Vaşinqton sonradan uzunmüddətli razılaşma əldə edə bilmədiklərini açıqlayıb.
Yeni danışıqlar raundunun olub-olmayacağı hələlik məlum deyil. Bununla belə, ABŞ administrasiyası yaxın günlərdə görüşlərin İslamabadda yenidən və üzbəüz formatda davam edə biləcəyini bildirir.
Ən son xəbərləri və yenilikləri almaq üçün ain.az saytını izləyin.
