Azərbaycan millisinin və "Kolambus Kryu" komandasının hücumçusu Nəriman Axundzadə ABŞ-də növbəti oyununu keçirib.
Fanat.Az xəbər verir ki, 21 yaşlı hücumçu ABŞ Açıq Kubokunun 1/16 final mərhələsində "Riçmond Kikers" ilə qarşılaşmanın iştirakçısı olub.
21 yaşlı forvard səfərdə baş tutan oyuna start heyətində başlayıb və matçı əvəzolunmadan başa vurub.
Milli komandamızın üzvü komandasının ilk qolunda iştirak edib. Onun cinahda Marselo Errera ilə qurduğu hücumu Yuqo Pikar qola çevirib.
Görüş Nərimanın komandasının 3:0 hesablı qələbəsi ilə bitib.
“Kolambus Kryu” 1/8 finalda "One Knaxville" ilə qarşılaşacaq. Sözügedən oyun 30 apreldə baş tutacaq.
Qeyd edək ki, ABŞ klubuna qış fasiləsində "Qarabağ"dan keçən Nəriman Axundzadə MLS təmsilçisi ilə 2029-cu ilin yayınadək müqavilə imzalayıb.
