Bakı, 14 aprel, AZƏRTAC
Prezident İlham Əliyevin İran İslam Respublikasının Prezidenti Məsud Pezeşkiana zəng etməsi və tərəflər arasındakı son diplomatik təmaslar regional sabitliyin qorunması və mehriban qonşuluq münasibətlərinin möhkəmləndirilməsi baxımından müstəsna əhəmiyyət kəsb edir. İran ilə ABŞ arasında əldə olunmuş iki həftəlik atəşkəs elanından dərhal sonra dövlətimizin başçısının iranlı həmkarına zəng edərək təbriklərini çatdırması Bakının bölgədə gərginliyin azaldılmasına verdiyi önəmin bariz nümunəsidir. Atəşkəs elanından sonra İranı təbrik edən ilk liderin məhz Prezident İlham Əliyev olması Azərbaycanın qonşu dövlətin sabitliyində nə dərəcədə maraqlı olduğunu və diplomatik çevikliyini bir daha sübut etdi.
Bu sözləri AZƏRTAC-a açıqlamasında Milli Məclisin deputatı Günay Ağamalı söyləyib.
“Tarixi təcrübə göstərir ki, Azərbaycan İran üçün ən ağır sınaq günlərində öz səmimi davranışı ilə sadiq dost olduğunu dəfələrlə isbat edib. Müxtəlif xarici dairələrin əsassız iddialarına və regiondakı mürəkkəb geosiyasi vəziyyətə baxmayaraq, Azərbaycan-İran sərhədi İran üçün hər zaman ən təhlükəsiz məkandır. Azərbaycan ərazisindən qonşu dövlətə qarşı hər hansı təhdidin yaranmasına heç vaxt imkan verilməyib ki, bu da rəsmi Bakının prinsipial və etibarlı tərəfdaşlıq mövqeyinin göstəricisidir. Bu mənəvi bağlılıq və dəstək özünü ən kədərli anlarda da büruzə verib. İranın ali dini lideri Əli Xomeneinin vəfatı ilə bağlı İran xalqına ilk başsağlığı verən və şəxsən İran səfirliyini ziyarət edən dövlət başçısı məhz Azərbaycan Prezidenti oldu. Eyni zamanda, Azərbaycanın çətin anlarda İrana humanitar yardım göndərməsi dostluq münasibətlərinin real və humanitar təməllərə söykəndiyini nümayiş etdirdi”, - deyə G.Ağamalı söyləyib.
Deputat əlavə edib ki, bütün bu xoşməramlı təşəbbüslər Azərbaycanın İrana olana səmimi və dost münasibətinin əyani təzahürləridir. Uzun müddətdir İranda Azərbaycanı özləri üçün təhlükə hesab edənlər və düşmən obrazı yaratmağa çalışan müəyyən dairələr artıq reallıqları aydın şəkildə görməkdədirlər. Bakının atdığı addımlar süni şəkildə yaradılan gərginlikləri və dezinformasiyaları tamamilə iflasa uğradır. Bölgədə yaranmış yeni müsbət atmosfer fonunda iki ölkə arasındakı əlaqələrə kölgə salmağa çalışan qüvvələrin səs ucaltmasına bundan sonra imkan verilməyəcək və münasibətlər qarşılıqlı etimad əsasında daha da möhkəmlənəcək.
