Macarıstanda parlament seçkilərində qalib gələn Tisza Partiyasının lideri Peter Magyar ölkə rəhbərliyinin dərhal istefasını tələb edib.
Vətəninfo.az xəbər verir ki, siyasətçi mitinq zamanı canlı yayımda çıxış edərək, mövcud prezidenti və dövlət aparatını sərt tənqid edib. O, hazırkı hakimiyyəti “kuklalar” adlandıraraq, onların vəzifələrini tərk etməli olduqlarını bildirib.
Magyar qeyd edib ki, Macarıstan uzun illər Viktor Orbán tərəfindən aparılan “balanslaşdırma” siyasətindən imtina edəcək və bundan sonra diqqətini NATO çərçivəsində müdafiə qabiliyyətinin gücləndirilməsinə yönəldəcək. Onun sözlərinə görə, ölkədə demokratik institutların fəaliyyəti bərpa olunacaq və Macarıstan yenidən Avropa İttifaqı və NATO daxilində güclü müttəfiqə çevriləcək.
Siyasətçi həmçinin bildirib ki, yaxın günlərdə Belçikaya səfər etməyi planlaşdırır. Səfərin məqsədi ölkə üçün mühüm əhəmiyyət daşıyan və hazırda dondurulmuş vəziyyətdə olan Avropa fondlarının blokdan çıxarılmasına nail olmaqdır. Magyar hesab edir ki, hazırkı rəhbərlik hakimiyyətin ötürülməsi prosesini gecikdirməməlidir.
“Respublika Prezidentini məni hökuməti qurmağa dəvət etməyə və bundan sonra istefa verməyə çağırıram. Bütün ‘kuklalar’ da eyni addımı atmalıdır”, – deyə o vurğulayıb.
Qeyd edək ki, seçkilər ərəfəsində analitiklər Viktor Orbán hakimiyyətinin zəiflədiyini bildirirdi. Müşahidələrə görə, seçicilər xarici təhdidlərdən çox, iqtisadi problemlər və korrupsiya məsələlərinə üstünlük veriblər. Uzun illər davam edən idarəçilik dövründə hakimiyyətə qarşı yorğunluq və etimadsızlıq formalaşıb.
Qələbəsindən sonra Peter Magyar sosial şəbəkədə paylaşım edərək tərəfdarlarına təşəkkür edib və seçkinin nəticəsini tarixi hadisə kimi qiymətləndirib. O, macar xalqının “ölkəni geri aldığını” və uzunmüddətli hakimiyyət dövründən sonra siyasi sistemdə ciddi dəyişikliklərin başlandığını bildirib.
