Ailə, Qadın və Uşaq Problemləri üzrə Dövlət Komitəsinin təşəbbüsü, Elm və Təhsil Nazirliyi, eləcə də Mədəniyyət Nazirliyinin dəstəyi ilə keçirilən "Parlayan ZİYA: təbliğat-təşviqat qrupu" layihəsi çərçivəsində növbəti görüş Gəncə Dövlət Milli Dram Teatrında təşkil olunub.
"Far.Az"un Qərb bürosunun məlumatına görə, əhali ilə keçirilən görüş zamanı ziyalılar öz təcrübələrinə əsaslanaraq bölgə üçün aktual mövzular ətrafında çıxış ediblər, iştirakçıların suallarını cavablandırdılar.
Ailə, Qadın və Uşaq Problemləri üzrə Dövlət Komitəsinin Uşaq məsələləri şöbəsinin müdir müavini Günel Nağdəliyeva çıxışında bu gündən etibarən, "Parlayan Ziya" maarifləndirici layihəyə start verildiyini vurğulayıb:
"Layihənin əsas məqsədi ziyalılar tərəfindən bölgələrə səfərlərin təşkili, yerli əhali ilə maarifləndirici görüşlərin keçirilməsi və müxtəlif mövzular ətrafında müzakirələrin aparılmasıdır".
Onun sözlərinə görə, layihə çərçivəsində uşaqların özünütərbiyəsi, milli-mənəvi dəyərlərin təbliği, eləcə də valideyn məsuliyyətinin artırılması kimi mühüm məsələlərə diqqət yetirilir:
"Eyni zamanda, ziyalılar tərəfindən öz fəaliyyətləri və nailiyyətləri ilə bağlı əhalinin məlumatlandırılması işi nümunəvi formada təbliğ edilir. Bu gün layihənin ilk tədbiri Gəncədə baş tutdu. Bunun da xüsusi simvolik əhəmiyyəti var. Bildiyiniz kimi, Gəncə hər zaman öz ziyalıları və mütəfəkkirləri ilə seçilən bölgələrimizdən biri olub".
Komitə rəsmisi layihənin iki mərhələdən ibarət olduğunu qeyd edib:
"Birinci mərhələdə "Parlayan Ziya" layihəsi çərçivəsində Gəncə şəhərində fəaliyyət göstərən ziyalılardan ibarət Əlaqələndirici Şura yaradılıb. Bu şura gələcəkdə bölgədə analoji maarifləndirici tədbirlərin davamlı şəkildə keçirilməsini təmin edəcək".
Bildirilib ki, "Parlayan ZİYA" layihəsinin gələcəkdə ölkənin digər regionlarında da mərhələli şəkildə həyata keçirilməsi planlaşdırılır.
Gəncə şəhərində region ziyalılarının iştirakı ilə dəyirmi masa təşkil olunub.
"Far.Az"un Qərb bürosunun məlumatına görə, tədbir Ailə, Qadın və Uşaq Problemləri üzrə Dövlət Komitəsinin təşəbbüsü, Elm və Təhsil Nazirliyi, eləcə də Mədəniyyət Nazirliyinin dəstəyi ilə Gəncə şəhərində "Parlayan ZİYA: təbliğat-təşviqat qrupu" layihəsi çərçivəsində baş tutub.
Layihənin əsas məqsədi ölkənin tanınmış ziyalıları, elm, mədəniyyət, idman və din xadimlərini regionlara cəlb etməklə əhali ilə birbaşa ünsiyyət platforması yaratmaq, aktual sosial mövzular ətrafında fikir mübadiləsi aparmaq və gənc nəslin sağlam, savadlı, məsuliyyətli vətəndaş kimi formalaşmasına dəstək verməkdir.
İki hissədən ibarət olan görüşün birincisi bölgə ziyalılarının iştirakı ilə Gəncə Şəhər İcra Hakimiyyətində baş tutub.
Görüş zamanı region üzrə yerli əlaqələndirici şura yaradılıb.
