Fransa Prezidenti Emmanuel Makron özünün Facebook səhifəsində İran Prezidenti Məsud Pezeşkyan və ABŞ Prezidenti Donald Trampla ayrı-ayrılıqda telefon danışığı apardığını bildirib.
Vətəninfo.az xəbər verir ki, Makron atəşkəsin mümkün olan ən yaxşı addım olduğunu qeyd etdi və Livandakı vəziyyət də daxil olmaqla, bütün tərəflər tərəfindən ona ciddi şəkildə əməl olunacağına ümid etdiyini bildirdi.
O, atəşkəsin qorunmasının regionda təhlükəsizliyin gücləndirilməsinə yönəlmiş hərtərəfli danışıqların başlanması üçün zəruri şərait yaratdığını vurğuladı.
Prezident yazıb ki, “İstənilən razılaşma İranın nüvə və ballistik raket proqramları, eləcə də Hörmüz boğazından sərbəst naviqasiyaya mane olan regional fəaliyyətləri və hərəkətləri ilə bağlı məsələləri həll etməlidir”.
Bundan əlavə, Makron Fransanın Qətər, Birləşmiş Ərəb Əmirlikləri, Livan və İraq da daxil olmaqla Yaxın Şərqdəki tərəfdaşları ilə sıx əlaqədə hərəkət edərək davamlı sülhün təmin edilməsində fəal iştirak etmək niyyətində olduğunu açıqladı.
