ain.az xəbər verir, Azpolitika.az saytına əsaslanaraq.
Macarıstanda keçiriləcək seçkilər ölkənin siyasi xəritəsini köklü şəkildə dəyişə bilər.
"AzPolitika" xəbər verir ki, bu barədə "Reuters" agentliyinin yaydığı məlumatda bildirilir.
Sorğu şirkəti "Median"ın proqnozuna əsasən, müxalif Tisza Partiyası parlamentdə üçdə iki çoxluğu əldə etməyə yaxındır. Bu isə partiyaya konstitusiyanı dəyişmək və Avropa İttifaqı fondlarının açılması üçün tələb olunan əsas qanunları qəbul etmək imkanı verə bilər.
Məlumata görə, partiya 199 yerlik parlamentdə 138–142 mandat qazana bilər. Müqayisə üçün qeyd olunur ki, konstitusion çoxluq üçün minimum 133 mandat tələb olunur.
Hazırkı Baş nazir Viktor Orban və onun rəhbərlik etdiyi Fidesz Partiyası isə son 16 ildə ən ciddi siyasi sınaqla üz-üzədir. Proqnozlara görə, Fidesz cəmi 49–55 yer qazana bilər.
Mərkəz-sağ yönümlü Tisza Partiyasına isə Peter Magyar rəhbərlik edir və o, hazırda müstəqil sorğuların əksəriyyətində öndə gedir.
Proqnozda həmçinin ifrat sağçı Our Homeland Movement partiyasının 5–6 mandat əldə edəcəyi göstərilir.
"Median" şirkəti bildirib ki, hesablamalar fevralın sonu və mart ayında keçirilmiş beş sorğunun nəticələrinə əsaslanır və ümumilikdə 5 min nəfəri əhatə edir. Qeyd edək ki, bu şirkət əvvəlki seçkilərdə də Viktor Orban-ın qələbəsini dəqiq proqnozlaşdırmışdı.
Bununla belə, hakim Fidesz Partiyası hələ də bəzi sorğulara istinad edərək seçkilərdə qalib gələcəyini iddia edir. Müxalifət isə həmin sorğuların hakimiyyətə yaxın qurumlar tərəfindən aparıldığını bildirir.
Beləliklə, Macarıstanda qarşıdan gələn seçkilər yalnız hakimiyyət uğrunda mübarizə deyil, həm də ölkənin gələcək siyasi kursunun müəyyənləşməsi baxımından həlledici mərhələ kimi qiymətləndirilir.
Rasim
"AzPolitika.info"
Hadisənin gedişatını izləmək üçün ain.az saytında ən son yeniliklərə baxın.
