Gündəlik həyatımızın ən sevilən şirniyyatlarından biri olan şokolad haqqında maraqlı və bir qədər də düşündürücü fakt məlum olub.
Milli.Az xəbər verir ki, mütəxəssislər bildirirlər ki, şokoladın əsas tərkib hissəsi olan kakao əslində bitkilərin özünü qorumaq üçün istehsal etdiyi təbii zəhərdir.
Təbiətdə bir çox bitkilər otyeyənlərdən qorunmaq üçün müxtəlif müdafiə mexanizmləri inkişaf etdirir. Kakao paxlaları da bu strategiyanın bir hissəsi olaraq teobromin və kofein kimi metilksantin alkaloidləri sintez edir. Bu maddələr bitkini həşəratlardan və digər zərərvericilərdən qoruyur və əslində toksik xüsusiyyət daşıyır.
Araşdırmalara görə, bu maddələr xüsusilə heyvanlar üçün təhlükəlidir. İtlər, pişiklər və quşlar bu toksinləri parçalaya bilmədikləri üçün hətta az miqdarda tünd şokolad belə onların mərkəzi sinir sisteminə ciddi zərər verə və ürək problemlərinə səbəb ola bilər.
İnsan orqanizmi isə bu baxımdan daha davamlıdır. Qaraciyərdəki xüsusi fermentlər sayəsində bu zərərli maddələr daha sürətli zərərsizləşdirilir. Lakin bu, şokoladın tamamilə təhlükəsiz olduğu anlamına gəlmir.
Mütəxəssislər xəbərdarlıq edirlər ki, metilksantinlər yüksək miqdarda qəbul edildikdə insan sağlamlığı üçün risk yarada bilər. Bu zaman ürəkbulanma, titrəmə, ürək ritmində pozğunluqlar və digər ciddi simptomlar ortaya çıxa bilər.
Elmi hesablamalara əsasən, yetkin bir insan üçün teobrominin öldürücü dozası təxminən 84 qram hesab olunur. Bu isə bir dəfəyə təxminən 6,5 kiloqram tünd şokolad yeməyə bərabərdir. Bununla belə, insan orqanizmi adətən bu qədər yüksək miqdara çatmadan qoruyucu reaksiyalar - xüsusilə qusma refleksi - vasitəsilə özünü müdafiə edir.
Mütəxəssislər qeyd edirlər ki, adi miqdarda şokolad istehlakı təhlükəli olmasa da, həddindən artıq istifadə sağlamlıq üçün ciddi risklər yarada bilər.
Fidan
Milli.Az
