Müəllif:Mehin Qasımova,Banco.az
"Intel" ABŞ-ın Texas ştatında inşa ediləcək yeni yarımkeçirici fabriki – “Terafab” layihəsində "SpaceX" və "Tesla" ilə əməkdaşlıq edəcək. Layihə İlon Maskın rəhbərlik etdiyi şirkətlərin süni intellekt və yüksək performanslı hesablama sahəsində iddialı planlarının bir hissəsi kimi təqdim olunur.
Banco.az xəbər verir ki, "Intel" sosial platforma X-də yayımladığı açıqlamada bildirib ki, şirkətin ultra yüksək performanslı çiplərin dizaynı, istehsalı və qablaşdırılması sahəsindəki imkanları "Terafab" layihəsinin əsas hədəfi olan ildə 1 teravat (TW) emal gücünə çatmasını sürətləndirəcək. Bu gücün süni intellekt və robototexnika sahəsində gələcək inkişaflara təkan verəcəyi vurğulanır.
Xatırladaq ki, ötən ay İlon Mask rəhbərlik etdiyi texnologiya şirkətləri arasında əməkdaşlıq elan edib. Bu əməkdaşlıq çərçivəsində süni intellekt hesablamaları, peyk sistemləri və SpaceX-in planlaşdırdığı kosmik məlumat mərkəzi üçün çiplərin hazırlanması, həmçinin Tesla-nın muxtar nəqliyyat vasitələri və robot texnologiyalarının inkişafı nəzərdə tutulur.
Bununla belə, yarımkeçirici zavodların tikintisi texnologiya sektorunda ən mürəkkəb və kapital tutumlu layihələrdən biri hesab olunur. Belə obyektlərin yaradılması adətən illər çəkir. Bu tip layihələrin dəyəri çox vaxt 20 milyard dolları aşır.
