ABŞ-da İranla bağlı davam edən hərbi əməliyyatların altıncı həftəyə keçməsi Respublikaçılar Partiyası daxilində narahatlığı artırıb. Prezident Donald Trampın Tehranı Hörmüz boğazını açmağa məcbur etmək üçün təhdidlərini sərtləşdirməsi və İran infrastrukturunu hədəfə ala biləcəyini bildirməsi, artıq bəzi konqresmenlər tərəfindən ehtiyatla qarşılanır.

Əməliyyatın əvvəlində onun 4–5 həftə davam edəcəyi gözlənilsə də, hazırda münaqişənin uzanaraq daha genişmiqyaslı qarşıdurmaya çevrilə biləcəyi ehtimalı müzakirə olunur. Xüsusilə, Trampın quru əməliyyatı variantını istisna etməməsi gərginliyi daha da artırıb.

Respublikaçı senator Con Körtis bildirib ki, prezidentin milli təhlükəsizliyi qorumaq addımlarını dəstəkləsə də, Konqresin razılığı olmadan hərbi əməliyyatların 60 gündən artıq davam etməsinə qarşıdır. O, 1973-cü il Müharibə Səlahiyyətləri Aktına istinad edərək qeyd edib ki, bu müddət fövqəladə vəziyyətlər üçün kifayət qədərdir və sonrakı qərarlar xalqın seçilmiş nümayəndələri tərəfindən verilməlidir.

Nebraskadan olan konqresmen Don Beykon da oxşar mövqe sərgiləyərək, münaqişə 60 günü keçərsə, məsələni Konqresdə səsverməyə çıxarmağın mümkünlüyünü istisna etməyib. O, eyni zamanda müharibənin qısa müddətdə başa çatacağına ümid etdiyini vurğulayıb.

Digər tərəfdən, bəzi Respublikaçılar hələ də Trampın siyasətini dəstəkləyir. Senator Coni Ernst Hörmüz boğazının açılmasının yalnız ABŞ üçün deyil, Avropa və digər ölkələr üçün də əhəmiyyətli olduğunu bildirib.

Bununla yanaşı, ictimai rəy əməliyyata qarşı yönəlməkdə davam edir. CNN-in keçirdiyi son sorğuya əsasən, amerikalıların 66 faizi İranla bağlı hərbi müdaxiləni dəstəkləmir.

Konqres daxilində də fikir ayrılıqları dərinləşir. Bəzi qanunvericilər əlavə hərbi büdcəyə qarşı çıxır, digərləri isə quru qoşunlarının mümkün istifadəsinin ciddi risklər doğurduğunu bildirirlər. Eyni zamanda, Demokratlar yeni müharibə səlahiyyətləri qanun layihəsini gündəmə gətirməyə hazırlaşır.

Müşahidəçilər hesab edir ki, qarşıdakı günlərdə həm siyasi, həm də hərbi baxımdan veriləcək qərarlar ABŞ-ın İran siyasətinin gələcək istiqamətini müəyyən edəcək.

Arzuman Loğmanoğlu
Sozcu.info

• Əməliyyat
• Narahatlıq
• İran