İspaniyanın xarici işlər naziri Xose Manuel Albares Madridin Kubaya tətbiq edilən blokadanın dayandırılmasının tərəfdarı olduğunu bəyan edib.
AFN.az xəbər verir ki, TVE kanalına müsahibəsində diplomat adaya humanitar yardımın davam etdiriləcəyinə söz verib: "Biz blokada vəziyyətinin sona çatmasını və Kuba xalqının öz gələcəyini sərbəst şəkildə müəyyən etməsini istəyirik".
Qeyd edək ki, 2026-cı ilin yanvarından ABŞ-ın yanacaq tədarükünə tam blokada tətbiq etməsi nəticəsində Kubada vəziyyət kəskin pisləşib. Mart ayında ölkənin enerji sistemi üç dəfə sıradan çıxıb, benzin və dizel qıtlığı yaranıb, bəzi aviaşirkətlər isə yanacaq yoxluğu səbəbindən uçuşları dayandırıb.
İspaniya hökuməti beynəlxalq birliyi Kubadakı humanitar vəziyyətə diqqət yetirməyə və tətbiq olunan məhdudiyyətlərin mülki əhali üzərindəki mənfi təsirlərini aradan qaldırmağa çağırır.
