İsrailin Hayfa şəhərinə endirilən ballistik raket zərbəsi nəticəsində həlak olanların sayı 4-ə çatıb.
Musavat.com xəbər verir ki, İsrail xilasetmə xidmətləri İranın massiv hücumu zamanı dağılan yaşayış binasının qalıqları altından daha iki nəfərin cəsədini çıxarıblar. Bununla da, 18 saatdan çox davam edən gərgin axtarış-xilasetmə əməliyyatı faciəvi sonluqla yekunlaşıb. Xilasetmə işlərini dağıntılar arasında partlamamış döyüş başlığının olması daha da çətinləşdirib və mütəxəssislər ikinci bir partlayış riskinə qarşı olduqca ehtiyatlı davranmalı olublar.
Faciənin qurbanları barədə məlumatlar:
80 yaşlı kişi və qadın (yaşlı cütlük);
40 yaşlı kişi;
35 yaşlı qadın.
İranın bu ballistik raket zərbəsi Hayfanın mülki infrastrukturuna ciddi ziyan vurub, onlarla ailə evsiz qalıb. İsrail Müdafiə Ordusu (SAXAL) bu hücumu "qırmızı xəttin keçilməsi" adlandıraraq, İranın raket bazalarına qarşı cavab zərbələrinin qaçılmaz olduğunu bəyan edib. Hazırda şəhərdə matəm ab-havası hökm sürür, yaralıların müalicəsi isə xəstəxanalarda davam etdirilir.
Musavat.com
