Bakı, 6 aprel, AZƏRTAC
Hər il aprelin 6-da İnkişaf və Sülh naminə Beynəlxalq İdman Günü qeyd olunur. 2026-cı ildə bu əlamətdar gün idmanın Davamlı İnkişaf Gündəliyinə nail olunmasına verdiyi töhfəyə diqqət yetirir.
AZƏRTAC BMT-nin veb-saytına istinadla xəbər verir ki, bu il idman proqramlarının və layihələrinin xəstəliklərin qarşısının alınması və ictimai sağlamlığın təşviqindən tutmuş qadınların və həssas qrupların səlahiyyətləndirilməsinə qədər Davamlı İnkişaf Məqsədlərinə nail olunmasına verdiyi töhfəni nümayiş etdirən ən yaxşı təcrübələr vurğulanacaq. Bu kontekstdə hökumətləri, beynəlxalq və milli idman qurumlarını, qeyri-hökumət təşkilatlarını və özəl sektoru cəlb edəcək tematik kampaniyaların, təhsil və sosial-idman layihələrinin, beynəlxalq və bələdiyyə tədbirlərinin keçirilməsi gözlənilir.
BMT Baş Assambleyasının 23 avqust 2013-cü il tarixli qətnaməsi ilə təsis edilən bu əlamətdar gün sağlamlığın təşviqi, gender bərabərliyinə nail olmaq, bərabərsizliklərin azaldılması, dinc və inklüziv icmaların qurulması üçün idmanın güclü bir vasitə kimi rolunu vurğulayır. Birləşmiş Millətlər Təşkilatı və onun İnkişaf və Sülh Naminə İdman Ofisi idman əsaslı təşəbbüslər vasitəsilə insan hüquqlarının, sosial və iqtisadi inkişafın təşviqi üzrə qlobal və yerli səyləri təşviq edir.
Baş Assambleya öz qətnaməsində üzv dövlətləri Birləşmiş Millətlər Təşkilatı sistemini və xüsusən də BMT-nin İnkişaf və Sülh Naminə İdman Ofisini, müvafiq beynəlxalq təşkilatları, eləcə də qlobal, regional və milli idman strukturlarını, qeyri-hökumət təşkilatları və özəl sektor da daxil olmaqla vətəndaş cəmiyyətini və bütün digər müvafiq maraqlı tərəfləri da İnkişaf və Sülh naminə Beynəlxalq İdman Gününün qeyd edilməsində, habelə bu barədə məlumatlılığın artırılmasında əməkdaşlıq etməyə dəvət edir.
Birləşmiş Millətlər Təşkilatının bədən tərbiyəsi və idman üzrə aparıcı agentliyi olan UNESCO idmanın sosial inteqrasiya, gender bərabərliyi və gənclərin rolunun artırılması üçün güclü bir vasitə olduğuna inanır. Bu fəaliyyətlərin faydaları stadionlardan daha çox hiss olunur. İdmanda və onun vasitəsilə qazanılan dəyərlər, məsələn, ədalətli oyun və komanda ruhu, bütövlükdə cəmiyyət üçün əvəzsizdir.
Hökumətlərin, beynəlxalq təşkilatların və vətəndaş cəmiyyətinin nümayəndələri bu əlamətdar günün həmrəyliyi, qarşılıqlı hörməti və sosial dialoqu gücləndirmək, eləcə də əhalinin bütün təbəqələri üçün idmana çıxışı genişləndirmək üzrə bir platforma kimi istifadəsinə çağırırlar.
