“İslamabad razılaşması” adlanan sənəd dərhal atəşkəs və sonrakı geniş sazişi nəzərdə tutur...
Məlumata görə, ABŞ və İran münaqişənin tənzimlənməsi üçün hazırlanmış yeni planı qəbul edib və sənədin artıq bazar ertəsindən qüvvəyə minə biləcəyi bildirilir. Təklif olunan razılaşma həyata keçirilərsə, Hörmüz boğazının yenidən açılması da mümkün ola bilər.
Poliqon xəbər verir ki, bu barədə Reuters Agentliyi məlumat yayıb.
Plan iki mərhələdən ibarətdir. İlk mərhələdə dərhal atəşkəsin elan edilməsi nəzərdə tutulur. Ardınca isə 15–20 gün ərzində tərəflər arasında daha geniş və əhatəli sülh sazişinin imzalanması planlaşdırılır. Sənəd ilkin olaraq “İslamabad razılaşması” adlandırılır.
Bildirilir ki, qarşılıqlı anlaşma memorandumu Pakistan vasitəsilə elektron formada yekunlaşdırılacaq. Pakistan hazırda tərəflər arasında əsas və yeganə əlaqə kanalı kimi çıxış edir.
Razılaşmanın yekun variantı İranın nüvə silahı əldə etməyə çalışmamaq öhdəliyini götürməsi qarşılığında sanksiyaların yumşaldılmasını və dondurulmuş aktivlərin azad edilməsini nəzərdə tutur.
Reuters Agentliyinin məlumatına əsasən, Pakistan ordusunun baş komandanı, feldmarşal Asim Munir ABŞ-nin vitse-prezidenti Cey Di Vens, xüsusi nümayəndə Stiv Uitkoff və İranın xarici işlər naziri Abbas Araqçi ilə gecə boyu intensiv təmaslar aparıb.
Bununla belə, Pakistanlı mənbələr bildirirlər ki, Tehran hələlik bu təkliflərə rəsmi öhdəlik verməyib. Mənbələrdən birinin sözlərinə görə, vasitəçilərin iştirakı ilə irəli sürülən müvəqqəti atəşkəs planına İran tərəfi hələ cavab təqdim etməyib.
Ekspertlər qeyd edirlər ki, belə bir razılaşma baş tutarsa, bu, regionda gərginliyin azalmasına və qlobal enerji bazarlarında sabitliyin bərpasına mühüm təsir göstərə bilər.
Poliqon.info
