Tural Qurbanov ilk dəfə beynəlxalq oyunu idarə etdi

Azərbaycanlı FİFA referisi Tural Qurbanov ötən gün ilk dəfə beynəlxalq oyunda baş hakim kimi oyun idarə edib.

Arena.az xəbər verir ki, o, 17 yaşadək futbolçular (U-17) arasında təşkil edilən Avropa çempionatının seçmə mərhələsinin 2-ci raundu çərçivəsində baş tutmuş Niderland – Belarus matçının baş hakimi olub.

Tural Qurbanov Niderlandın 2:1 hesabı ilə qalib gəldiyi görüşdə 3 futbolçuya sarı vərəqə göstərib. O, meydan sahiblərinin iki, qonaqların isə 1 oyunçusuna rəsmi xəbərdarlıq edib.

Xatırladaq ki, bu oyunda digər azərbaycanlı hakim Asiman Əzizli də Tural Qurbanovun köməkçisi funksiyasını yerinə yetirib.

Üç komandanın yer aldığı 7-ci qrupda Niderland 2 oyuna topladığı 6 xalla lider olub. Belarus 3 xalla 2-ci yeri tutubsa, hər iki matçda uduzmuş Kosovo sonuncu yerlə kifayətlənib.