AZCON Holding şirkətlərindən olan “Azərbaycan Hava Yolları” QSC-nin “Azəraeronaviqasiya” Hava Hərəkəti İdarəsi (AZANS) fəaliyyətinin 30 illiyini qeyd edir. Bu müddət ərzində AZANS ölkənin hava məkanının idarə olunmasında ardıcıl inkişaf yolu keçərək müasir, təhlükəsiz və səmərəli aeronaviqasiya sistemini formalaşdırıb.
AZANS-dan Aznews.az-a verilən məlumata görə, Azərbaycanın Avropa ilə Asiyanı birləşdirən əsas hava nəqliyyatı dəhlizlərinin kəsişməsində yerləşməsi ölkənin qlobal hava nəqliyyatı sistemində strateji rolunu müəyyən edən əsas amillərdəndir. Son dövrlərdə regionda baş verən dəyişikliklər fonunda bu mövqe daha da möhkəmlənib və Azərbaycan hava məkanı beynəlxalq aviasiya üçün etibarlı tranzit marşrut kimi ön plana çıxıb.
Bu tendensiya son illərin statistik göstəricilərində də aydın şəkildə əks olunur. Belə ki, 2021-ci ildə 80 880 olan uçuş sayı 2025-ci ildə 342 167-yə çataraq ölkənin qlobal hava nəqliyyatı sistemində rolunun nəzərəçarpacaq dərəcədə genişləndiyini nümayiş etdirir.
Xüsusilə tranzit daşımalar üzrə müşahidə olunan dinamika diqqət çəkir. 2021-ci ildən etibarən Azərbaycanın hava məkanı üzərindən tranzit uçuşların həcmi 360% artıb. Bu proses fonunda Bakı Uçuş Məlumat Bölgəsi (Baku FIR) üzrə gündəlik tranzit uçuşların sayı bəzi günlərdə 830-ə qədər yüksələrək əməliyyat intensivliyinin artdığını aydın şəkildə göstərir.
Eyni zamanda, hava məkanından istifadə intensivliyi də əhəmiyyətli dərəcədə artıb. 2021-ci ildə 0,49 olan uçuş sıxlığı göstəricisi 2025-ci ildə 2,07-yə yüksələrək mövcud resurslardan daha səmərəli istifadə olunduğunu nümayiş etdirir.
