Çiyələk əkini üçün ən uyğun vaxt yaz və payız aylarıdır. Adətən mart-aprel aylarında edilən əkinlər yayda məhsul verdiyi halda, sentyabr-oktyabr aylarında edilən əkinlər növbəti il daha bol məhsul əldə etməyə imkan verir.
Milli.Az xəbər verir ki, ilin iki müxtəlif dövründə əkin aparıla bilər və hər dövrün öz üstünlüyü var:
Yaz əkini (Mart-Aprel): Elə həmin il daxilində məhsul götürmək mümkündür.
Payız əkini (Sentyabr-Oktyabr): Bitki torpağa daha yaxşı uyğunlaşır və kökləri güclənir, növbəti il məhsuldarlıq daha yüksək olur.
İqlimə görə diqqət edilməli məqamlar:
Soyuq bölgələrdə yaz əkini daha təhlükəsizdir.
Mülayim bölgələrdə payız əkini daha səmərəli nəticə verir.
Şaxta riski olan günlərdə əkin aparılmamalıdır.
Şitil, yoxsa toxum?
Çiyələk yetişdirərkən ən çox üstünlük verilən üsul şitil əkilməsidir. Toxumdan yetişdirmək mümkündür, lakin bu, daha zəhmətli və uzunmüddətli bir prosesdir. Şitil daha sürətlə böyüyür və tez məhsul verir.
Çiyələk necə əkilir?
Günəşli yer seçin: Çiyələk bol günəş işığını sevir.
Torpağı hazırlayın: Torpağı havalandırın və üzvi gübrə əlavə edin.
Aralı əkin: Şitilləri bir-birinə çox yaxın əkməyin ki, hava dövranı olsun.
Düzgün dərinlik: Kökləri torpağa basdırın, lakin bitkinin "ürək" hissəsi (yarpaqların çıxdığı mərkəz) torpağın üzərində qalmalıdır.
Əkindən dərhal sonra suvarma vacibdir.
Çiyələk üçün hansı torpaq uyğundur?
Yüngül turşulu (pH 5.5-6.5) torpaqlar.
Üzvi maddələrlə zəngin olanlar.
Drenajı yaxşı olan (suyu saxlayan, lakin gölməçə yaratmayan) torpaqlar.
Çox bərk və ya gilli torpaqlarda köklər inkişaf edə bilmir.
Çiyələk neçə günə yetişir və nə vaxt meyvə verir?
Köklərin tutması: 1-2 həftə.
İlk çiçəkləmə: 3-4 həftə.
Meyvə vermə: 1-2 ay.
Məhsul yığımı: Yaz əkinində may-iyun, payız əkinində isə növbəti ilin may ayında başlayır.
Dibçəkdə yetişirmi?
Bəli, çiyələk dibçəkdə yetişdirmək üçün ən uyğun meyvələrdən biridir. Balkonlarda rahatlıqla yetişdirilə bilər. Bunun üçün geniş və altı deşikli (drenajlı) dibçək, keyfiyyətli torpaq və bol günəş kifayətdir.
Çiyələk çoxillik bitkidir, düzgün qulluqla hər il məhsul verir.
Torpaq həmişə nəmli qalmalı, lakin bitki suyun içində boğulmamalıdır.
Lalə Qüdrətova
Milli.Az
