Rusiya Prezidentinin mətbuat katibi Dmitri Peskov Ukrayna Prezidenti Volodimir Zelenskinin "enerji atəşkəsi" təkliflərinə və cəbhədəki son vəziyyətə münasibət bildirərək, rəsmi Kiyevə ultimatum xarakterli ismarış göndərib.
Musavat.com xəbər verir ki, Peskov Zelenskinin vaxtında sülh masasına əyləşməyəcəyi təqdirdə, gələcəkdə bunun Ukrayna üçün çox daha yüksək qiymətə başa gələcəyini bəyan edib. Kreml rəsmisi vurğulayıb ki, hazırda cəbhədəki dinamika qətiyyən Ukraynanın xeyrinə deyil və Rusiya qoşunları bütün təmas xətti boyunca irəliləməyə davam edir.
Peskovun sözlərinə görə, Kiyev rejimi hazırda özünə gəlmək üçün "istər Pasxa atəşkəsi, istərsə də hər hansı digər fasiləyə" şiddətlə ehtiyac duyur, lakin Rusiya tərəfi bunu sadəcə vaxt qazanmaq taktikası kimi qiymətləndirir. Ukrayna Silahlı Qüvvələrinin Rusiya ərazisindəki kritik infrastruktura, o cümlədən Ust-Luqa limanına endirdiyi zərbələri "terror aktı" adlandıran Peskov, bu cür obyektlərin qorunmasına baxmayaraq, 100% təhlükəsizliyin hər zaman təmin edilə bilməyəcəyini etiraf edib.
O həmçinin əlavə edib ki, hələlik Rusiya Prezidenti Vladimir Putinin Kuba rəhbərliyi ilə telefon danışığı planlaşdırılmayıb, lakin zərurət yaranarsa, bu təmas dərhal təşkil oluna bilər.
Analitiklər Peskovun bu çıxışını Rusiyanın hərbi üstünlüyünü diplomatik təzyiqə çevirmək cəhdi və Ukraynaya qarşı ərazi iddialarının gələcəkdə daha da genişlənə biləcəyinə bir işarə kimi qiymətləndirirlər.
Musavat.com
- Ночной Режим
- Домашняя страница
- Статистика
- Источники
- Рейтинг
- Погода
- Валюта
