Son günlər intensiv yağan yağışlı hava şəraitindən sonra sosial şəbəkələrdə Çin istehsalı avtomobillərlə bağlı “cərəyan vurma riski” iddiaları gündəmə gəlib. Belə ki, bəzi sürücülər güclü yağışdan sonra avtomobillərə toxunarkən və ya avtomobilə minərkən elektrik cərəyanının hiss olunduğunu iddia edirlər və bu səbəbdən yağışlı havada avtomobili idarə edə bilmədiklərini bildirirlər.
Mövzu ilə bağlı Pravda.az-a açıqlama verən nəqliyyat üzrə ekspert, “Legacy Motor and Service” şirkətinin direktoru Razil Nağıyevin sözlərinə görə, yağışlı havadan sonra yayılan və xüsusilə Çin istehsalı avtomobillərlə bağlı səsləndirilən “cərəyan vurma riski” iddiaları əsasən yanlış anlaşılma və şişirdilmiş məlumatlara əsaslanır.
O bildirib ki, müasir avtomobillər, o cümlədən elektrik nəqliyyat vasitələri beynəlxalq təhlükəsizlik standartlarına uyğun şəkildə istehsal olunur və onların elektrik sistemləri tam izolyasiya olunmuş vəziyyətdədir: “Yüksək gərginlikli komponentlər avtomobilin metal gövdəsindən ayrılmış formada işləyir və bu səbəbdən adi şəraitdə avtomobilin xarici hissəsinə toxunmaqla elektrik cərəyanı vurması mümkün deyil. Yağış, rütubət və ya avtomobilin yuyulması kimi hallar da bu baxımdan təhlükə yaratmır. Elektrik avtomobillərinin batareyaları və elektrik sistemləri suya qarşı qorunan xüsusi konstruksiyaya malikdir. Hətta yağışlı hava şəraitində avtomobilin şarj olunması belə təhlükəsizlik baxımından nəzərə alınaraq dizayn edilib. Bu səbəbdən yalnız yağış faktına görə avtomobilin təhlükəli olması iddiası texniki baxımdan əsassızdır. Digər tərəfdən, real risk yalnız avtomobilin elektrik sistemində nasazlıq olduqda, zədələnmiş naqillər mövcud olduqda, avtomobil su altında qaldıqda və ya qeyri-peşəkar müdaxilələr edildikdə yarana bilər. Bu isə yalnız müəyyən bir ölkənin istehsalı ilə bağlı deyil, bütün avtomobillər üçün ümumi texniki risk faktorudur. Nəticə etibarilə, normal istismar şəraitində, xüsusilə yağışlı havalarda avtomobilə minmək və ya ona toxunmaq təhlükəli hesab olunmur. Sürücülərə tövsiyə olunur ki, avtomobilin texniki vəziyyətinə daim nəzarət etsinlər, zədələnmiş elektrik komponentləri olduqda nəqliyyat vasitəsindən istifadə etməsinlər, yalnız rəsmi və peşəkar servis xidmətlərinə müraciət etsinlər”.
Şəhanə Quliyeva
