Livandakı döyüşlərdə 21 “Merkava” tankının məhv edildiyi iddia olunur, məlumat rəsmi təsdiqini tapmayıb...
Poliqon xəbər verir ki, Livanın şiə silahlı qruplaşması olan “Hizbullah” martın 26-da ölkənin cənubunda baş verən döyüşlər zamanı İsrail ordusuna məxsus 21 ədəd “Merkava” tankını məhv etdiyini bildirib. Qruplaşmanın açıqlamasına görə, texnikanın böyük hissəsi Taybə və Kantara ərazilərində əvvəlcədən planlaşdırılmış pusqular nəticəsində sıradan çıxarılıb.
Məlumatda qeyd olunur ki, İsrailin zirehli texnikasına dəyən zərərin miqyası son onilliklər üçün misli görünməmiş səviyyədədir. İsrail Müdafiə Qüvvələri son 40 il ərzində bir döyüşdə bu qədər böyük itki ilə üzləşməyib.
Qruplaşma vurğulayır ki, baş verən toqquşmalar intensivliyinə görə son qırx ilin bütün münaqişələrini geridə qoyur. Bildirilir ki, oxşar miqyaslı zərbələr ən son 1982-ci il Livan müharibəsi dövründə qeydə alınıb.
Bununla belə, təqdim olunan məlumatlar hələlik İsrail tərəfi tərəfindən rəsmi şəkildə təsdiqlənməyib. Hərbi ekspertlər qeyd edirlər ki, belə iddiaların obyektiv qiymətləndirilməsi üçün müstəqil mənbələrin və əlavə sübutların ortaya çıxması vacibdir.
Poliqon.info
