Dörd həftədə 850 raketin istifadəsi Pentaqonda narahatlıq yaradıb, istehsal isə tələbatdan geri qalır...
Poliqon xəbər verir ki, The Washington Post nəşrinin məlumatına görə, ABŞ son dörd həftə ərzində İranla bağlı əməliyyatlar çərçivəsində 850 ədəd “Tomahawk” qanadlı raketindən istifadə edib. Bu göstərici Pentaqonda ciddi narahatlıq doğurur, çünki bu tip yüksək dəqiqlikli silahların ehtiyatları məhduddur.
Məqalədə qeyd olunur ki, “Tomahawk” raketlərinin illik istehsal həcmi cəmi bir neçə yüz ədəd təşkil edir. Bu isə qlobal ehtiyatların sürətlə azalması fonunda onların bərpasını çətinləşdirir. Hərbi ekspertlər hesab edir ki, belə intensiv istifadə ABŞ-nin uzunmüddətli hərbi imkanlarına təsir göstərə bilər.
Bildirilir ki, “Tomahawk” raketlərinin müasir versiyaları 2004-cü ildən etibarən silahlanmada istifadə olunur və yüksək texnoloji imkanlara malikdir. Bu raketlər peyk vasitəsilə idarə olunur, əvvəlcədən təyin olunmuş hədəfləri vurmaqla yanaşı, real vaxt rejimində GPS texnologiyası vasitəsilə yeni hədəfləri də müəyyən edə bilir. Bundan əlavə, raketlər döyüş zonasının üzərində “barraj” edərək vəziyyəti müşahidə edir və üzərindəki kamera vasitəsilə komandanlığa zərbənin nəticələri barədə məlumat ötürür.
ABŞ Hərbi Dəniz Qüvvələrinin məlumatına görə, ən yeni “Tomahawk” raketlərinin bir ədədinin qiyməti 3,6 milyon dollara qədər çatır və onların istehsalı iki ilə qədər vaxt aparır. Son illərdə isə bu raketlərin alınması kiçik partiyalarla həyata keçirilib. Məsələn, ötən ilin müdafiə büdcəsində cəmi 57 ədəd raketin alınması nəzərdə tutulmuşdu.
Mütəxəssislər bildirirlər ki, yüksək qiymət, uzun istehsal müddəti və məhdud ehtiyatlar fonunda bu silahların intensiv istifadəsi ABŞ-nin hərbi planlaşdırmasına yenidən baxmasını zəruri edə bilər.
Poliqon.info
