Hindistanın Karnataka ştatında bir begemot onun çəpərinə girən baytarı parçalayıb.
Ölkə.Az "Daily Mail"ə istinadən xəbər verir ki, hadisə axşam saatlarında baş verib. 27 yaşlı Samekşa Reddi əvvəlcə quşun müayinəsini başa vurub, sonra Hamsini adlı hamilə 15 yaşlı begemotunun vəziyyətini termal görüntüləmə kamerası ilə yoxlamaq üçün onun çəpərinə girib.
Proseduru tamamladıqdan sonra heyvan qəfildən baytara hücum edərək ciddi xəsarətlər yetirib. O, təcili olaraq xəstəxanaya aparılıb, lakin ağır xəsarətlər və qan itkisi səbəbindən onu xilas etmək mümkün olmayıb.
Dövlət orqanları hadisəni faciəvi adlandırıb və qadının ailəsinə başsağlığı verib. Karnataka Meşə Naziri Eşvar Xandre ailəsinə maddi yardım göstəriləcəyini bildirib.
Hadisədən sonra hakimiyyət orqanları həmçinin bölgədəki bütün zooparklarda vəhşi heyvanlarla işləmək üçün təhlükəsizlik qaydalarına riayət olunmasının yoxlanılmasını əmr edib. Xüsusi komissiyanın hadisənin səbəbləri barədə bir həftə ərzində hesabat təqdim etməsi tələb olunur.
