Tez-tez belə bir sual yaranır: ABŞ və İsrail indiyədək İranın raket qurğularını niyə məhv edə bilməyib?
Musavat.com xəbər verir ki, bunun əsas səbəbi həmin qurğuların bütöv bir "raket şəhərlərindən" ibarət olmasıdır.
Sözügedən komplekslər ballistik raketlərin saxlanması, onlara xidmət göstərilməsi və gizli şəkildə işə salınması üçün nəzərdə tutulmuş nəhəng dərin tunellər və bunkerlər şəbəkəsidir. Bu obyektlər qalın süxur təbəqələri və betonla hava zərbələrindən etibarlı şəkildə qorunur, həmçinin avtomatlaşdırılmış yanacaq doldurma və şaquli atəş sistemləri ilə təchiz olunub.
Dağlıq rayonlarda yerləşən bu tunel kompleksləri çoxkilometrlik yeraltı qalereyalardan ibarətdir ki, burada buraxılış qurğularının üzərində yüzlərlə raket saxlanılır. Start sistemləri həm bunkerlərdən çıxaraq atəş açmağa qadir olan mobil komplekslər, həm də stasionar şaxtalar şəklindədir.
Raketlərin birbaşa tunelin daxilində sürətlə döyüş vəziyyətinə gətirilməsi üçün xüsusi avtomatlaşdırılmış sistemlərdən istifadə olunur. Obyektlərin yerin çox dərin qatlarında yerləşməsi onları yüksək dəqiqlikli silahlardan qoruyur və arsenalın qorunma ehtimalını maksimum dərəcədə artırır.
Məsələnin vizual tərəfi də olduqca təsirlidir. Ötən gün İran İslam İnqilabı Keşikçiləri Korpusu (SEPAH) orta və uzaq mənzilli hava hücumundan müdafiə sistemlərinin yerləşdiyi yeni yeraltı obyektinin görüntülərini yayımlayıb.
BBC-nin reportyoru Fərzad Seyfikaranın "X" sosial şəbəkəsində verdiyi məlumata görə, həmin ərazidə çoxsaylı buraxılış qurğuları və raket konteynerləri ehtiyatı cəmlənib.
Musavat.com
