ABŞ-ın Apple şirkəti 2026-cı ilin ilk doqquz həftəsində Çində smartfon satışlarını 23% artırıb və sənayedəki ümumi eniş trendinə qarşı fərqli nəticə göstərib.
Marja xəbər verir ki, Şirkət, bəzi Android istehsalçılarının artan yaddaş çip xərclərinə görə qiymətləri qaldırdığı bir dövrdə bazarda mövqeyini gücləndirib.
Çinin ümumi smartfon bazarı isə yanvar–martın əvvəlinə qədər olan dövrdə illik müqayisədə 4% azalıb. İl əvvəlində tətbiq edilən dövlət subsidiyalarına baxmayaraq, zəif istehlak tələbi bazarı canlandıra bilməyib. Bu barədə araşdırma şirkəti Counterpoint Research məlumat yayıb.
Apple-ın artımı əsasən e-ticarət endirimləri və bazaya aid iPhone 17 modelinin dövlət subsidiyalarına uyğun olması ilə izah edilir.
Məlumata görə, Apple güclü təchizat zənciri sayəsində artan yaddaş çip xərclərini rəqiblərinə nisbətən daha yaxşı idarə edə bilir və qiymətləri kəskin artırmadan bazar payını genişləndirməyə çalışır.
Eyni zamanda, OPPO və VİVO kimi Çinin Android smartfon istehsalçıları bəzi modellərdə qiymət artımı elan ediblər. Bu addımın həm xərclərin təsirini yoxlamaq, həm də yeni modellərin qiymət strategiyasını müəyyənləşdirmək məqsədi daşıdığı bildirilir.
Huawei isə daha çox yerli təchizatçılardan istifadə etdiyi üçün yaddaş çiplərindəki qiymət artımından nisbətən az təsirlənir və bu üstünlüyünü orta və aşağı seqment bazarında pay qazanmaq üçün istifadə edə bilər.
Counterpoint-in proqnozuna görə, Çin smartfon bazarı mart–may aylarında təzyiq altında qalacaq, iyun ayında keçirilən “618” alış-veriş festivalı isə müvəqqəti canlanma gətirə bilər. Lakin yaddaş çiplərindəki qiymət artımı 2026-cı il boyu davam edəcəyi üçün istehsalçılar xərcləri idarə etmək, marjanı qorumaq və satış hədəflərinə çatmaq arasında çətin seçimlərlə üzləşəcəklər.
