Araz-Naxçıvan” Azərbaycan Premyer Liqasının 25-ci turunda səfərdə “Şamaxı”nı 1:0 hesabı ilə məğlub edib.
Msport.az xəbər verir ki, qonaqların baş məşqçisi Andrey Demçenko mətbuat konfransında jurnalistlərin suallarını cavablandırıb:
– Fasilədən əvvəlki 2 oyunda məqsədimiz 6 xal toplamaq idi. Buna nail olduq. Komandamı təbrik edirəm. Birinci hissədə qol epizodlarımız oldu, oyuna nəzarət edirdik. Bu, o deməkdir ki, artıq komandada nəsə var. İkinci hissənin sonlarında o qədər də yaxşı təsir bağışlamadıq. Rəqib uzun toplarla oynamağa başladı və bizdə problemlər üzə çıxdı. Oyun heç-heçə ola bilərdi. Komandam müdafiədə yaxşı oynadı. Rəqibi yüz faizli imkanlardan yararlanmağa qoymadılar. Bu gün iki tam fərqli hissə gördük. Birinci hissədə daha yaxşı idik. İkinci yarının ortalarından etibarən rəqib üstünlüyü ələ aldı. Nəticə qazanmaq üçün döyüşmək lazımdır.
– Qarşıda milli fasilə olacaq. Bu fasilədən necə istifadə edəcəksiz?
– Futbolçulara 3-4 gün istirahət verəcəyik. Bundan sonra isə hazırlaşmaq üçün vaxtımız olacaq. Qarşıda bizi “Sabah” və “Neftçi” ilə çətin oyunlar gözləyir. Planımızda yoxlama görüşü keçirmək də var.
– Əsas qapıçınız kimdir?
– Kim hazırdırsa, ona şans veririk.
