ABŞ-nin təzyiqləri fonunda Havana sərt mesaj verdi, Vaşinqtonla mümkün siyasi dəyişikliklər müzakirə olunur...
Kuba prezidenti Migel Dias-Kanel ölkəsinin hər hansı xarici müdaxiləyə qarşı qətiyyətlə cavab verəcəyini bəyan edib və ABŞ-ni Kubada konstitusiya quruluşunu zorla dəyişdirməyə cəhd etməkdə ittiham edib.
Poliqon xəbər verir ki, bu barədə The New York Times və digər beynəlxalq mənbələr məlumat yayıb.
Prezident sosial şəbəkə X-də paylaşımında bildirib ki, ABŞ Kubaya qarşı iqtisadi və siyasi təzyiqlərini artıraraq ölkəni zəiflətməyə çalışır. Onun sözlərinə görə, Vaşinqtonun məqsədi Kubanın resurslarını, iqtisadiyyatını və mülkiyyətini nəzarət altına almaqdır. Dias-Kanel bu siyasəti “bütün xalqa qarşı kollektiv cəza xarakterli iqtisadi müharibə” kimi qiymətləndirib.
O vurğulayıb ki, ən pis ssenari baş verəcəyi halda belə, Kuba xalqı müqavimət göstərməyə hazırdır.
“Hər hansı xarici aqressor qırılmaz müqavimətlə üzləşəcək”, deyə Dias-Kanel vurğulayıb.
Bununla yanaşı, 13 mart tarixində Kuba lideri ABŞ ilə danışıqların başladığını açıqlayıb. Məlumata görə, Vaşinqton tərəfi hazırkı prezidentin istefasını tələb edir. Eyni zamanda, ehtimal olunan varis kimi Raul Kastronun nəvəsi Raul Gilermo Rodriges Kastro adı çəkilir və onun artıq danışıqlarda iştirak etdiyi bildirilir.
Mövcud vəziyyət ABŞ-Kuba münasibətlərində gərginliyin yeni mərhələyə keçdiyini göstərir. Ekspertlər hesab edirlər ki, tərəflər arasında həm siyasi dialoq, həm də qarşılıqlı təzyiqlər paralel şəkildə davam edəcək və bu proses regionda geosiyasi balanslara təsir göstərə bilər.
Poliqon.info
