İran İslam İnqilabı Keşikçiləri Korpusu bildirir ki, son illərdə istehsal edilən bir çox raket hələ də döyüş əməliyyatlarında istifadə olunmayıb...
Poliqon xəbər verir ki, İran İslam İnqilabı Keşikçiləri Korpusu (SEPAH) nümayəndələri hazırda həyata keçirilən raket zərbələri ilə bağlı açıqlama verərək istifadə olunan silahların böyük hissəsinin uzun müddət əvvəl istehsal edildiyini bildiriblər.
SEPAH rəsmilərinin sözlərinə görə, hazırda istifadə olunan raketlərin əksəriyyəti təxminən on il əvvəl istehsal edilib. Qurumun nümayəndələri qeyd ediblər ki, İranın raket arsenalında daha yeni texnologiyalar əsasında hazırlanmış çoxsaylı raketlər mövcuddur və onların böyük hissəsi hələ də istifadə olunmayıb.
Açıqlamada vurğulanıb ki, xüsusilə son 12 günlük müharibədən sonra istehsal edilmiş raketlərin əhəmiyyətli hissəsi hələ döyüş əməliyyatlarında tətbiq edilməyib. Bu isə İranın raket potensialının yalnız bir hissəsinin istifadə edildiyini göstərir.
SEPAH rəsmiləri bildiriblər ki, İranın müdafiə sənayesi son illərdə raket texnologiyalarının inkişafı istiqamətində ciddi irəliləyiş əldə edib və müxtəlif tipli uzaqmənzilli, dəqiq idarə olunan və modernləşdirilmiş raket sistemləri istehsal olunub.
Hərbi analitiklərin fikrincə, bu cür açıqlamalar İranın hərbi imkanlarının hələ tam istifadə edilmədiyini göstərmək və regionda potensial rəqiblərə strateji mesaj vermək məqsədi daşıyır. Ekspertlər qeyd edirlər ki, İranın raket proqramı Yaxın Şərqdə təhlükəsizlik balansına təsir edən əsas amillərdən biri hesab olunur.
Poliqon.info
