İsrail Müdafiə Qüvvələri Livanda əməliyyatları genişləndirmək planlarını elan etdikdən sonra Beyrutun mərkəzi, cənubu və şəhərətrafı ərazilərinə hücumlar təşkil edib.
AFP xəbər verir ki, xüsusilə, 12 mart Cümə axşamı günü Livan Universitetinin kampusu və radikal şiə hərəkatı Hizbullah ilə əlaqəli maliyyə şirkətinin ofisi hücuma məruz qalıb.
Livan dövlət xəbər agentliyi NNA-nın məlumatına görə, universitet kampusuna edilən pilotsuz təyyarə hücumunda iki işçi həlak olub. Ölkənin Səhiyyə Nazirliyi həmçinin Beyrutun cənubunda yerləşən Aramun şəhərində beş nəfərin öldüyünü bildirib. Nazirliyin məlumatına görə, onlar arasında bir uşaq da var. Beyrutun Ramlet əl-Bayda çimərliyinə səhər hücumunda ölənlərin sayı 12-yə çatıb, daha 28 nəfər yaralanıb.
Livan Səhiyyə Nazirliyinin məlumatına görə, 12 martda ölkə daxilində baş verən atəş nəticəsində 56 nəfər ölüb, 188 nəfər yaralanıb. 2 martda Livanda hücumlar başlayandan bəri ölənlərin sayı 98 uşaq və 52 qadın olmaqla 687-yə çatıb. Nazirlik bildirib ki, təxminən 1800 nəfər yaralanıb.
