Son illərdə texnologiyanın sürətli inkişafı bir çox sahədə yeni imkanlar yaradıb və bu dəyişikliklər kənd təsərrüfatından da yan keçmir. Ənənəvi üsullarla aparılan əkinçilik artıq tədricən rəqəmsal texnologiyalar və innovativ həllərlə əvəz olunur. Xüsusilə süni intellekt kimi müasir texnologiyalar kənd təsərrüfatında daha səmərəli idarəetmə, resurslardan düzgün istifadə və yüksək məhsuldarlıq əldə etmək üçün yeni perspektivlər açır.
Bu barədə deputat Azər Badamov Missiya.Az-a danışıb.
"Süni intellekt müasir texnologiyalar arasında ən sürətlə inkişaf edən istiqamətlərdən biridir və onun kənd təsərrüfatında tətbiqi böyük imkanlar yaradır. Bu texnologiyalar torpağın vəziyyəti, hava şəraiti və bitkilərin inkişafı ilə bağlı böyük həcmdə məlumatları analiz edərək fermerlərə daha düzgün qərarlar qəbul etməyə kömək edir. Nəticədə əkin planlaşdırılması, suvarma və gübrələmə daha dəqiq həyata keçirilir və məhsuldarlıq artır",-deputat bildirib.
Azər Badamovun sözlərinə görə, əsas üstünlüklərdən biri resurslardan daha səmərəli istifadə edilməsidir. Məsələn, süni intellektə əsaslanan sistemlər torpağın rütubətini və qida maddələrinin səviyyəsini müəyyən edərək suvarma və gübrələməni optimal şəkildə təşkil etməyə imkan verir. Bu isə həm xərclərin azalmasına, həm də ətraf mühitin qorunmasına müsbət təsir göstərir. Bundan əlavə, bu texnologiyalar məhsulun keyfiyyətinin artırılmasına və itkilərin azalmasına da kömək edir.
"Müasir dronlar və sensor sistemləri vasitəsilə əkin sahələrinin vəziyyəti izlənilir, bitkilərdə yaranan xəstəliklər və zərərvericilər isə erkən mərhələdə aşkar edilə bilir. Bu isə fermerlərə vaxtında tədbir görmək imkanı yaradır və məhsul itkisini minimuma endirir.
Bildiyimiz kimi, iqlim dəyişiklikləri kənd təsərrüfatına ciddi təsir göstərir. Süni intellekt müxtəlif məlumatları analiz edərək hava şəraiti və mümkün risklər barədə proqnozlar hazırlaya bilir. Bu proqnozlar fermerlərə əkin planlarını daha düzgün qurmağa və riskləri azaltmağa kömək edir.
Azərbaycanda aqrar sektor iqtisadiyyatın prioritet sahələrindən biridir və bu sahədə innovativ texnologiyaların tətbiqi böyük əhəmiyyət daşıyır. Süni intellektin tətbiqi kənd təsərrüfatının modernləşdirilməsinə, məhsuldarlığın artırılmasına və fermerlərin rəqabət qabiliyyətinin gücləndirilməsinə mühüm töhfə verə bilər. Hesab edirəm ki, gələcəkdə bu istiqamətdə dövlət və özəl sektor arasında əməkdaşlıq daha da genişlənəcək",-A.Badamov əlavə edib.
İlahə Qənbərli
Missiya.Az
