ABŞ-nin Respublikaçılar İnstitutu Ermənistanda sorğu keçirib. Parlament seçkilərinə üç ay qalmış – ötən ay təşkil edilən plebissitin nəticələrinə görə, respondentlərin ən çox səsini hakim “Vətəndaş müqaviləsi” partiyası alıb – 24%.
Musavat.com xəbər verir ki, müxalifət partiyaları və blokları rəyi soruşulanların üst-üstə cəmi 15%-nin dəstəyi ilə kifayətlənməli olub.
Sorğunun nəticələri Nikol Paşinyanın seçkidən qalib çıxacağına əminlik yaradırmı? Seçkidə 24 faiz nəticə hakimiyyətdə qalmağı təmin edəcəkmi?
Ekspertlərin fikrincə, Ermənistanda keçirilən sorğuda Nikol Paşinyanın rəhbərlik etdiyi “Vətəndaş müqaviləsi” partiyasının 24% dəstək toplaması ilk baxışda lider mövqeyi göstərir. Lakin bu rəqəm seçkidə qəti qələbə demək deyil. 24% liderlikdir, amma çoxluq deyil.
Ermənistanda parlament seçkiləri proporsional sistemlə keçirilir və hökuməti formalaşdırmaq üçün 50%+ mandat və ya koalisiya lazımdır. 24% səs yalnız ən çox dəstək alan partiya olmaq deməkdir. Təkbaşına hökumət qurmaq üçün yetərli deyil. Sorğuya görə, müxalifət partiyaları birlikdə cəmi 15% toplayır. Bu isə göstərir ki, müxalifət vahid blok yarada bilməyib, səslər bir neçə partiya arasında bölünür. Belə vəziyyətdə 24% ilə belə hakim partiya parlamentdə ən böyük fraksiya ola bilər. Xüsusilə müxalifət parçalanmış vəziyyətdə qalarsa, Paşinyanın rəhbərlik etdiyi “Vətəndaş müqaviləsi” partiyasının yenidən hakimiyyətdə qalması ehtimalı yüksəkdir.
Bu cür sorğularda adətən 30–40%-ə yaxın seçici qərarsız olur. Seçkiyə yaxın bu səslər istiqamət dəyişə və nəticələr ciddi fərqlənə bilər. Ermənistan qanunvericiliyinə görə, parlamentdə sabit çoxluq mexanizmi var. Əgər heç kim çoxluq qazana bilməzsə, ən çox mandat alan partiya koalisiya qurmaq üçün üstün mövqedə olur, lazım gələrsə, ikinci tur və ya siyasi razılaşmalar mümkündür.
Etibar Seyidağa,
Musavat.com
