futbolpress-az saytından əldə olunan məlumata görə, ain.az məlumat yayır.
“Qəbələ” Premyer Liqanın XXII turunda “Karvan-Yevlax”la heç-heçə edib – 1:1.
Bölgə təmsilçisinin müdafiəçisi Seydina Keyta “Futbolpress.az“a açıqlamasında oyunu dəyərləndirdi:
“Autsayderə qarşı xal itirmək məyusedicidir. Kifayət qədər şanslarımız oldu, amma son zərbələrdə dəqiqlik çatmadı. Qol imkanlarını boşa verdiyimiz üçün xallar itirdik”.
Keyta qış transfer dönəmində “Qəbələ”yə qoşulub. O, qısa müddət olmasına baxmayaraq, artıq komandanın əsas oyunçularından birinə çevrilib. Keyta “qırmızı-qaralar”a adaptasiyası haqda bunları dedi:
“Həmişə bacarıqlarıma inamışam. Şükürlər olsun, uyğunlaşma problemim olmadı. Təcrübəmdən istifadə etdim və indi komanda üçün ən yaxşısını etməyə çalışıram”.
“Qəbələ” Azərbaycan Kubokunun 1/4 final mərhələsinin cavab matçında “Sabah”la üz-üzə gələcək. Komandalar bir müddət əvvəl çempionatda qarşılaşmış və “bayquşlar” qələbə qazanmışdı (1:0). Həmin matçda “Qəbələ” son dəqiqədə qol vursa da, VAR müdaxiləsindən sonra hakim qolu saymamışdı. Keyta “Sabah”la duellərin gərginliyindən və kubokda hədəflərdən söz açdı:
“Sabah”la matçda nələr olduğunu gördük. Lakin indi bu, geridə qalıb. Hər oyunun öz hekayəsi var. Qarşıdakı matça köklənmişik. Ümid edirəm ki, yaxşı nəticə əldə edə biləcəyik.
Çempionatda yolumuza davam edirik. Xal fərqi olsa da, arxayınlıq yoxdur. Hələ qarşıda çox oyun var və bacardığımız qədər xallar qazanmağa çalışacağıq. Kuboka gəlincə, yaxşı heyətimiz var. Düşünürəm ki, titul qazanmaq şansımız var. Buna zəhmət və inamla nail olmaq olar”.
Şahin Cəfərov
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
