Peyk görüntülərinə əsasən, uranın zənginləşdirilməsi mərkəzində bir neçə bina zərər görüb...
Poliqon xəbər verir ki, CNN telekanalı peyk görüntülərinə istinadən İranın Natanz şəhərində yerləşən və ölkənin ən böyük uran zənginləşdirmə mərkəzlərindən biri hesab olunan nüvə obyektində zədələnmə qeydə alındığını bildirib. Kanalın apardığı görüntü analizinə əsasən, obyekt ərazisində anbar və iki kiçik iki mərtəbəli binaya ziyan dəyib.
Məlumata görə, zərər görən tikililər işçilərin və nəqliyyat vasitələrinin Natanzdakı nüvə kompleksinin yeraltı hissələrinə keçidi üçün istifadə olunan əsas nöqtələrdən olub. Bu isə onu göstərir ki, zərbə birbaşa yeraltı qurğulara deyil, onların giriş və logistika infrastrukturuna yönəlib.
Bununla belə, Beynəlxalq Atom Enerjisi Agentliyinin (MAQATE) baş direktoru Rafael Qrossi martın 2-də bildirib ki, İran ərazisindəki nüvə obyektlərində hər hansı zədələnmə əlaməti müşahidə olunmayıb. Həmin gün İran hakimiyyəti MAQATE-yə rəsmi məktub göndərərək martın 1-də Natanz obyektinə ABŞ və İsrail tərəfindən iki zərbə endirildiyini məlumat verib.
Hazırda tərəflər arasında məlumatlarda müəyyən ziddiyyət mövcuddur. Bir tərəfdən peyk görüntüləri bəzi obyektlərin zədələndiyini göstərir, digər tərəfdən isə MAQATE rəhbərliyi nüvə infrastrukturunda ciddi dağıntıların qeydə alınmadığını bildirir. Ekspertlər qeyd edirlər ki, yeraltı qurğuların zədələnməsi barədə dəqiq nəticəyə gəlmək üçün əlavə texniki qiymətləndirmə və yerində yoxlama tələb olunur.
Natanz İranın nüvə proqramında strateji əhəmiyyətə malik əsas mərkəzlərdən biri hesab edilir. Bu obyektin fəaliyyəti beynəlxalq səviyyədə uzun müddətdir müzakirə mövzusu olaraq qalır və regiondakı hərbi-siyasi gərginlik fonunda diqqət mərkəzindədir.
Poliqon.info
