Fitnes cihazları idman elmini hər kəsin biləyinə gətirmək məsələsində rekord sürətlə irəliləyir.
QHT.AZ xarici mətbuata əsasən xəbər verir ki, Huawei GT Runner 2 ürək ritminin dəyişkənliyini, yorğunluq siqnallarını və məşq yükünü təhlil edir, sonra isə intensivlik və ya bərpa vaxtı ilə bağlı tövsiyələr verir.
Bir istehlakçı cihazı əvvəllər yalnız laboratoriya şəraitində, qan analizləri ilə ölçülən laktat həddini (lactate threshold) hesablamağa başlayanda, fitnes iqtisadiyyatında struktur dəyişiklik baş verdiyi aydın olur.
Cümə axşamı Madriddəki Galeria de Cristal-da təqdim edilən Huawei-nin yeni GT Runner 2 saatı qeyri-invaziv (qan götürülmədən) laktat həddi təyinetmə alqoritmini özündə birləşdirir və bu, fitnes texnologiyasında bir sıra yeniliklərdən yalnız biridir.
Saat həmçinin peşəkar qaçış komandası ilə əməkdaşlıq əsasında hazırlanmış qaçış gücü metrikalarını və yorğunluqla bərpa məlumatlarına uyğun intensivliyi tənzimləyən adaptiv marafon məşq planlarını təqdim edir. Bu xüsusiyyətlər sadəcə məhsul yeniləməsi deyil – əvvəllər mütəxəssis nəzarəti tələb edən performans analitikasının pərakəndə bazara çıxarılması deməkdir.
Məsələn, laktat həddinin ölçülməsi – yəni əzələlərin sürətlə yorulmağa başladığı nöqtənin müəyyən edilməsi – ənənəvi olaraq qaçış zolağında texniki heyətin nəzarəti altında aparılırdı. Qaçış gücü modelləşdirilməsi isə biomekanik analizə çıxışı olan elit idman komandalarına məxsus idi. Məşq periodizasiyası isə uzun mövsümlər üzrə məlumatların təhlili üçün alətlərə sahib məşqçilərin “gizli silahı” idi. Yəni alətlər və ekspertiza peşəkar və həvəskar idmançılar arasında rəqəmsal uçurum yaradırdı.
İndi isə istehlakçı cihazları bu uçurumu aradan qaldırıb.
GT Runner 2 ürək ritminin dəyişkənliyini, yorğunluq göstəricilərini və məşq yükünü təhlil edərək intensivlik və ya bərpa vaxtı barədə tövsiyə verir.
Bu səviyyəyə necə gəldiyimizi xatırlamaq faydalıdır. Qabaqcıl analitika əvvəlcə dar peşəkar seqmentə xidmət edirdi. Sonra rəqabət üstünlüyü eksklüzivlikdən alqoritmin keyfiyyətinə və ekosistemin dərinliyinə keçdi.
Bu proses maliyyə bazarlarını xatırladır: əvvəllər yalnız institusional treyderlərə məxsus olan qrafik və əməliyyat alətləri rəqəmsal inqilab nəticəsində açıq bazara çıxdı.
Dözümlülük idmanları da indi eyni yolu izləyir. Həvəskar qaçışçı artıq bir cihaz alaraq fizioloji modelləşdirməyə əsaslanan hədd göstəriciləri, temp rəhbərliyi və məşq yükü tənzimləmələri əldə edə bilir.
Bu alətlərin bəziləri artıq Huawei-nin daha istehlakçı yönümlü Watch GT 4, 5 və 6 modellərində mövcud idi. Lakin kiçik görünən yeniliklər ciddi idman biznesinə aparan yolun başlanğıcı olub.
Bu biznesin əsas hissəsi yaradılan məlumat miqyası ilə bağlıdır. Nə qədər çox qaçışçı məşqlərini qeyd edirsə, modelləşdirmə bir o qədər zənginləşir. Fizioloji reaksiyalar yaşa, iqlimə, hündürlüyə və məşq tarixçəsinə görə dəyişir. Qlobal istifadəçi bazası bu müxtəlifliyi sistemə geri ötürür və tövsiyələri zamanla dəqiqləşdirir. Başqa sözlə, məhsul istifadə olunduqca inkişaf edir. Əsas aktiv artıq saatın korpusu və ya ekranı deyil, toplanmış davranış məlumatıdır.
Bu isə məşqçilik iqtisadiyyatını dəyişir. İnsan məşqçilər uzunmüddətli strategiya və yarış planlamasında rol oynamağa davam etsələr də, alqoritmik sistemlər gündəlik işləri – yüklənmə bölgüsü və bərpa planlaşdırmasını – öz üzərinə götürür.
Bərpa modelləşdirilməsi əvvəllər yüksək performans idmanının bir hissəsi idi, indi isə gündəlik məşq və həyat tərzi qərarlarına təsir edir. Korporativ sağlamlıq proqramları artıq fəaliyyət göstəricilərini təşviq sistemlərinə inteqrasiya edir. Bu isə tibbi sığorta şirkətlərinin və sağlamlıq fondlarının diqqətini cəlb edir.
Brendlər üçün əsas çağırış artıq hardware dizaynından çox intellektual mülkiyyətlə bağlı olacaq. İstifadəçilər üçün isə məsələ zaman və etimaddır: öz davranış məlumatlarını bir ekosistemə yatırmaq və brendə güvənmək.
Platforma dəyişmək artıq maliyyə və ya bulud xidmətlərində olduğu kimi “keçid xərcləri” yaradır. Aylarla toplanmış məlumat və adaptiv planları başqa sistemə köçürmək çətinləşir. Wearable bazarında müştəri saxlama, hardware satışından daha vacib ola bilər.
Huawei Madriddəki təqdimatda ikiqat Olimpiya marafon çempionu Eliud Kipchoge-ni qlobal səfir kimi təqdim edərək bu yanaşmanı gücləndirdi. Bu, brendin peşəkar idman aləmində mövqeyini ciddi qəbul etdiyini göstərir.
Bu inkişaf sağlamlıq iqtisadiyyatına da təsir edir. Yeni imkanlar profilaktik baxım, erkən xəbərdarlıq və uzunmüddətli risk modelləşdirilməsi üçün zəmin yaradır. Modelləşdirmə mürəkkəbləşdikcə, saat artıq yalnız idman cihazı deyil, daha geniş iqtisadi çərçivədə fəaliyyət göstərən alətə çevrilir.
Ən önəmlisi isə odur ki, Watch GT Runner 2 təkcə bir məhsul deyil, sənayedə daha geniş tendensiyanın göstəricisidir. Elit idman elmi artıq tətbiq yeniləmələri və bulud emalı vasitəsilə kütləvi istifadəyə açılır.
Yüksək performans modelləşdirilməsi artıq gündəlik funksiyaya çevrilib.
