Avropa İttifaqı liderləri 2026-2027-ci illər üçün Ukraynanın büdcə və müdafiə xərclərini qarşılamaq məqsədilə 90 milyard avro məbləğində vəsaitin ayrılmasına dair razılıq əldə ediblər.
AFN.az xəbər verir ki, bu barədə Avropa İttifaqı Şurasının rəsmi saytında dərc olunmuş bəyanatda bildirilir. Avropa Komissiyasının sədri Ursula fon der Lyayen Kiyevə səfəri zamanı bu vəsaitin mütləq şəkildə təmin ediləcəyini vurğulayıb: "Biz bu krediti bu və ya digər yolla təmin edəcəyik. Əlimizdə müxtəlif variantlar var və biz onlardan istifadə edəcəyik".
Eyni zamanda, Rusiya Xarici Kəşfiyyat Xidməti (SVR) Fransa və Böyük Britaniyanın Ukraynanı nüvə silahı ilə təmin etməyə hazırlaşdığı barədə iddia irəli sürüb. Rusiya kəşfiyyatının məlumatına görə, London və Paris nüvə silahının ötürülməsini Ukraynanın "müstəqil elmi işləməsi" kimi qələmə verməyi planlaşdırır.
Lakin Qərb paytaxtları bu iddiaları rəsmən təkzib edir. Ekspertlər bu cür bəyanatların informasiya müharibəsinin bir hissəsi olduğunu və regionda gərginliyi artırmağa xidmət etdiyini bildirirlər.
