İslandiya Avropa İttifaqına (Aİ) qoşulmaqla bağlı referendumu daha tez keçirməyə çalışır. Xarici medianın yazdığına görə, Reykyavik üzvlük danışıqlarının bərpası ilə bağlı referendumu 2027-ci ildə keçirməyi planlaşdırırdı, lakin bu ümumxalq səsverməsi cari ilin avqust ayında baş tuta bilər.
Hafta.az xəbər verir ki, bu, Aİ-nin genişlənməsi üçün təkanların artdığı, Brüsselin gələn ilin əvvəlində Ukraynaya blokda qismən üzvlük verə biləcək bir plan üzərində işlədiyi və üzvlükdə lider olan Monteneqronun ötən ay daha bir danışıqlar fəslini bağlatdığı bir vaxta təsadüf edir.
Reykyavikin hakim koalisiyası əvvəlki hökumətin 2013-cü ildə danışıqları dondurmasından sonra 2027-ci ilə qədər Aİ üzvlüyünə dair müzakirələrin yenidən başlaması ilə bağlı referendum keçirəcəyinə söz vermişdi. Lakin geosiyasi qarışıqlıq dövründə - Vaşinqtonun İslandiyaya tarif tətbiq etmək qərarından və ABŞ Prezidenti Donald Trampın Qrenlandiyanın ilhaqı təhdidlərindən sonra bu proses sürətlənir.
İslandiya parlamentinin səsvermənin tarixini yaxın bir neçə həftə ərzində elan etməsi gözlənilir. Bu addım Aİ siyasətçilərinin İslandiyaya və Reykyavik nümayəndələrinin Brüsselə etdiyi çoxsaylı səfərlərdən sonra atılıb. Əgər islandiyalılar referendumda üzvlüyün lehinə səs versələr, digər namizəd ölkələrdən əvvəl Aİ-yə qoşula bilərlər.
Ötən ay Brüsseldə İslandiya rəsmiləri ilə görüşən Aİ-nin genişlənmə üzrə komissarı Marta Kos “Politico” nəşrinə bildirib: “Genişlənmə ilə bağlı söhbət dəyişir. Bu, getdikcə təhlükəsizlik, mənsubiyyət və rəqabət aparan təsir dairələri dünyasında hərəkət etmək qabiliyyətimizi qorumaqla bağlıdır. Hazırkı şərait bütün avropalıları narahat edir”.
Avropa Komissiyasının Prezidenti Ursula Fon der Lyayen ötən ay Brüsseldə İslandiyanın Baş naziri Kristrún Frostadóttir ilə görüşündə bildirib ki, onların tərəfdaşlığı “dəyişkən dünyada sabitlik və proseslərin proqnozlaşdırılmasını təklif edir”.
