Dünyanın ən çox axtarılan narkotik qaçaqmalçılarından biri, daha çox "El Mencho" kimi tanınan Nemesio Oseguera Meksikada öldürülüb. Bu barədə Reuters məlumat yayıb.
Narkotik qaçaqmalçısına qarşı hərbi əməliyyat ABŞ prezidenti Donald Tramp administrasiyasının Meksika hökumətinə narkotik qaçaqmalçılığına qarşı mübarizəni gücləndirmək üçün təzyiq göstərmək kampaniyası fonunda baş tutub. "El Menço"nun tutulması üçün 15 milyon dollar mükafat təklif edildi.
"Müdafiə Nazirliyi onu həbs etmək əməliyyatına rəhbərlik etdi və nəticədə öldürüldü", - deyə agentliyə mənbə bildirib. Oseguera ABŞ-ın cənub sərhədindən külli miqdarda kokain, fentanil və metamfetamin qaçaqmalçılığında ittiham olunurdu.
Osegueranın sui-qəsdi onun nəzarət etdiyi bölgələrdə iğtişaşlara səbəb oldu. Xüsusilə, silahlı qruplar Xalisko ştatının bir çox ərazilərində, o cümlədən Quadalaxara və sahildən Puerto Vallartaya qədər yolları bağladı və nəqliyyat vasitələrini, yanacaqdoldurma məntəqələrini, aptekləri və mağazaları yandırdı.
Xaliskodakı hadisələrdən sonra zorakılıq dalğası bir neçə qonşu ştata yayıldı. Miçoakan ştatında ən azı 13 bələdiyyədə narkotik blokadaları qeydə alınıb: Miçoakan qubernatoru Alfredo Ramirez Bedolla təcili təhlükəsizlik iclası çağırdı və Xalisko, Quanaxuato və Kolima ilə sərhədlərin gücləndirilməsini əmr etdi.
Xatırladaq ki, Trampın siyasəti narkotik kartellərinə qarşı genişmiqyaslı mübarizəyə yönəlib. O, bu məqsədlə minlərlə dənizçini işə götürüb və onları Latın Amerikası və Karib dənizinə göndərib.
Ötən ilin sentyabr ayında ABŞ hökuməti Cənubi Karib dənizindəki beynəlxalq sularda narkotik daşımaqda şübhəli bilinən bir gəmiyə hücum edildiyini bildirmişdi. ABŞ hakimiyyət orqanlarının məlumatına görə, hücum nəticəsində 11 nəfər həlak olub.
Əziz MUSTAFA
