ABŞ İordaniya və Səudiyyə Ərəbistanındakı bazalarda yerləşən hərbi təyyarələrin sayını əhəmiyyətli dərəcədə artırıb.
Newscenter.az xəbər verir ki, bu barədə Britaniyanın Financial Times (FT) qəzeti yazıb. Qəzetin məlumatına görə, Vaşinqton İrana qarşı bir neçə həftə davam edə biləcək mümkün hərbi kampaniya üçün Yaxın Şərqdə böyük hava gücü toplayır.
Nəşr peyk görüntülərinə və Tel-Əviv Universitetinin qiymətləndirməsinə istinadən İordaniya bazasında ən azı 66 qırıcı təyyarənin yerləşdiyini bildirir. Aviasiya üzrə ekspertin sözlərinə görə, görüntülərdə görünən təyyarələrdən 18-i F-35 qırıcılarıdır. Məqalədə bildirilir ki, bazada həmçinin 17 F-15 çoxməqsədli qırıcı və səkkiz A-10 hücum təyyarəsi yerləşir. Qəzet həmçinin qeyd edir ki, bazada EA-18 elektron müharibə təyyarələri və nəqliyyat təyyarələri də müşahidə olunub.
Qeyd edək ki, yanvar ayında Ağ Ev İslam Respublikasına qarşı güc tətbiqini ciddi şəkildə nəzərdən keçirdiyi barədə xəbərdarlıq edib. Daha sonra Vaşinqton Tehranın danışıqlar masasına oturacağına və nüvə silahlarının tamamilə ləğvini nəzərdə tutan ədalətli və bərabər bir razılaşmaya gələcəyinə ümid etdiyini bildirib. İran hakimiyyəti isə dəfələrlə nüvə bombası hazırlamaq niyyətində olmadığını bəyan edib.
Anar
